Home Breaking News पिंपरी-चिंचवडमध्ये अनधिकृत बांधकामे आणि अतिक्रमणांवर कारवाईचा धडाका; अतिरिक्त आयुक्त तृप्ती सांडभोर यांचे...

पिंपरी-चिंचवडमध्ये अनधिकृत बांधकामे आणि अतिक्रमणांवर कारवाईचा धडाका; अतिरिक्त आयुक्त तृप्ती सांडभोर यांचे अधिकाऱ्यांना कडक निर्देश

16
0
पिंपरी, दि. १८ नोव्हेंबर २०२६ : पिंपरी-चिंचवड शहरातील अनधिकृत बांधकामे, सार्वजनिक जागांवरील अतिक्रमणे आणि महापालिकेच्या मालकीच्या आरक्षित भूखंडांवरील बेकायदा कब्जे हटविण्याच्या कारवाईला आता गती देण्यात येणार आहे. महापालिका आयुक्त डॉ. विजय सूर्यवंशी यांच्या निर्देशानुसार अतिरिक्त आयुक्त तृप्ती सांडभोर यांनी संबंधित विभागांच्या अधिकाऱ्यांची आढावा बैठक घेऊन अतिक्रमणांवर कठोर कारवाई करण्याचे निर्देश दिले आहेत. महापालिकेच्या मुख्य प्रशासकीय भवनातील मधुकर पवळे सभागृहात ही बैठक पार पडली.
या बैठकीला बांधकाम परवानगी विभागाचे सहशहर अभियंता सुनील बागवानी, कार्यकारी अभियंते, उपअभियंते, सर्व क्षेत्रीय अधिकारी आणि बीट निरीक्षक उपस्थित होते. शहरातील विविध भागांमध्ये सुरू असलेल्या अनधिकृत बांधकामांची तसेच महापालिकेच्या मालकीच्या भूखंडांवर झालेल्या अतिक्रमणांची सद्यस्थिती यावेळी तपासण्यात आली.
महापालिकेच्या आरक्षित भूखंडांवरील अतिक्रमणे हटविण्याचे निर्देश
महापालिकेच्या मालकीच्या आणि विविध सार्वजनिक सुविधांसाठी आरक्षित असलेल्या भूखंडांवर झालेल्या अतिक्रमणांचा बैठकीत सविस्तर आढावा घेण्यात आला. या जागा नागरिकांच्या सार्वजनिक उपयोगासाठी राखीव असताना त्यावर अतिक्रमणे होणे ही गंभीर बाब असल्याचे लक्षात घेऊन संबंधित अधिकाऱ्यांना तातडीने कार्यवाही करण्याच्या सूचना देण्यात आल्या.
अतिक्रमण निष्कासित करण्यासाठी आवश्यक प्रस्ताव तयार करून ते पुढील आठवड्यात प्रत्यक्ष कारवाईसाठी तयार ठेवण्याचे निर्देश अतिरिक्त आयुक्त तृप्ती सांडभोर यांनी दिले. संबंधित क्षेत्रीय अधिकारी, नगररचना विभागाचे अधिकारी आणि बीट निरीक्षक यांनी समन्वयाने काम करून अतिक्रमणांची माहिती संकलित करावी, आवश्यक कागदपत्रांची पूर्तता करावी आणि निष्कासनाची प्रक्रिया नियोजनबद्ध पद्धतीने राबवावी, असेही स्पष्ट करण्यात आले.
पदपथांवरील अतिक्रमणांमुळे नागरिकांची गैरसोय; नियमित कारवाईचे आदेश
शहरातील सार्वजनिक पदपथांवर झालेले अतिक्रमण हा नागरिकांच्या दैनंदिन प्रवासातील महत्त्वाचा प्रश्न बनला आहे. अनेक ठिकाणी पदपथांवर साहित्य, हातगाड्या, व्यावसायिक वस्तू किंवा इतर स्वरूपातील अडथळे निर्माण झाल्याने पादचाऱ्यांना रस्त्यावरून चालावे लागते. त्यामुळे अपघातांचा धोका वाढण्याची शक्यता असते.
या पार्श्वभूमीवर सर्व क्षेत्रीय कार्यालयांच्या कार्यक्षेत्रातील सार्वजनिक पदपथांवरील अतिक्रमणे हटविण्याची नियमित कारवाई सुरू ठेवण्याचे निर्देश देण्यात आले. नागरिकांना सुरक्षितपणे आणि अडथळ्याविना पदपथांचा वापर करता यावा, यासाठी संबंधित विभागांनी विशेष लक्ष देण्याची आवश्यकता व्यक्त करण्यात आली.
अनधिकृत बांधकामांवर नियंत्रण ठेवण्याची जबाबदारी अधिकाऱ्यांवर
शहरात नव्याने उभ्या राहणाऱ्या अनधिकृत बांधकामांवर वेळेत लक्ष ठेवणे आणि नियमबाह्य बांधकामांवर नियमानुसार कारवाई करणे आवश्यक आहे. केवळ अतिक्रमण झाल्यानंतर कारवाई करण्याऐवजी सुरुवातीच्या टप्प्यातच अशा बांधकामांची माहिती घेऊन प्रतिबंधात्मक उपाययोजना करण्यावर भर देण्याची गरज आहे.
यासाठी क्षेत्रीय अधिकारी आणि बीट निरीक्षकांनी आपल्या कार्यक्षेत्रात नियमित पाहणी करावी. अनधिकृत बांधकामे किंवा अतिक्रमण आढळल्यास त्याची माहिती वरिष्ठ अधिकाऱ्यांना तातडीने द्यावी आणि पुढील कार्यवाहीसाठी आवश्यक प्रक्रिया पूर्ण करावी, अशी अपेक्षा बैठकीत व्यक्त करण्यात आली.
शहराच्या नियोजनबद्ध विकासासाठी अतिक्रमणमुक्त सार्वजनिक जागा महत्त्वाच्या
पिंपरी-चिंचवड शहराचा विस्तार वेगाने होत असून नागरिकांच्या वाढत्या गरजांनुसार रस्ते, पदपथ, उद्याने आणि विविध सार्वजनिक सुविधांसाठी आरक्षित जागांचे संरक्षण करणे महत्त्वाचे ठरत आहे. महापालिकेच्या आरक्षित भूखंडांवरील अतिक्रमणे कायम राहिल्यास भविष्यात नियोजित विकासकामांमध्ये अडथळे निर्माण होऊ शकतात.
त्यामुळे महापालिका प्रशासनाने अतिक्रमणविरोधी कारवाईला प्राधान्य देत संबंधित यंत्रणांना अधिक सक्रिय करण्याचे संकेत दिले आहेत. पुढील आठवड्यात आरक्षित भूखंडांवरील अतिक्रमण निष्कासनासाठी प्रस्तावित कारवाई कितपत प्रभावीपणे राबविली जाते, याकडे आता शहरवासीयांचे लक्ष लागले आहे.