पिंपरी-चिंचवड : पिंपरी-चिंचवड शहराच्या पश्चिम भागातील वाकड, पुनावळे आणि ताथवडे परिसरात गेल्या काही वर्षांत नागरीकरणाचा वेग मोठ्या प्रमाणात वाढला आहे. नव्याने उभारण्यात येणाऱ्या गृहप्रकल्पांमुळे तसेच वाढत्या लोकवस्तीमुळे या भागातील नागरिकांच्या दैनंदिन गरजांमध्येही वाढ होत आहे. त्याच पार्श्वभूमीवर भारत सरकारकडून मंजूर झालेल्या पुनावळे आणि ताथवडे सब-पोस्ट ऑफिससाठी पिंपरी-चिंचवड महानगरपालिकेने कायमस्वरूपी जागा उपलब्ध करून द्यावी, अशी मागणी नगरसेवक राहुल तानाजी कलाटे यांनी महापालिका आयुक्तांकडे केली आहे. यासंदर्भात त्यांनी सप्टेंबर २०२६ मध्ये आयुक्तांना पत्र देऊन प्रशासनाचे लक्ष वेधले होते.
भारत सरकारकडून पुनावळे आणि ताथवडे येथे स्वतंत्र सब-पोस्ट ऑफिस मंजूर करण्यात आले आहेत. त्यानुसार पुनावळे पोस्ट ऑफिससाठी ४११०८६, तर ताथवडे पोस्ट ऑफिससाठी ४११०८७ हा स्वतंत्र पिनकोड निश्चित करण्यात आला आहे. तसेच वाकड परिसरासाठी ४११०८८ हा स्वतंत्र पिनकोड देण्यात आला आहे. स्वतंत्र पिनकोड निश्चित झाल्यामुळे या परिसरातील टपाल व्यवस्थेला स्वतंत्र ओळख मिळाली असून, त्यानुसार स्थानिक पातळीवर स्वतंत्र टपाल कार्यालये सुरू होणे अत्यंत आवश्यक बनले आहे.
मात्र, पुनावळे आणि ताथवडे येथील मंजूर सब-पोस्ट ऑफिस प्रत्यक्षात सुरू करण्यासाठी आवश्यक जागेचा प्रश्न अद्याप प्रलंबित आहे. त्यामुळे मंजुरी मिळूनही नागरिकांना स्वतंत्र टपाल कार्यालयाच्या सुविधांचा लाभ घेता आलेला नाही. ही अडचण दूर करण्यासाठी महापालिकेने आपल्या मालकीच्या उपलब्ध जागांचा आढावा घ्यावा आणि संबंधित पोस्ट ऑफिस विभागाला अल्पदरात कायमस्वरूपी जागा उपलब्ध करून द्यावी, अशी ठोस मागणी राहुल कलाटे यांनी आपल्या पत्रातून केली आहे.
सध्या पुनावळे, ताथवडे आणि वाकड परिसरातील नागरिकांना टपाल कार्यालयाशी संबंधित कामांसाठी इतर भागांतील पोस्ट ऑफिसमध्ये जावे लागते. टपाल पाठविणे, पार्सल स्वीकारणे, नोंदणीकृत टपाल, बचत योजना, आर्थिक व्यवहार तसेच पोस्ट ऑफिसच्या इतर सेवांसाठी नागरिकांना प्रवास करावा लागतो. विशेषतः ज्येष्ठ नागरिक, महिला, विद्यार्थी, नोकरदार आणि व्यावसायिकांना यामुळे वेळ आणि श्रम खर्च करावे लागतात. स्थानिक पातळीवर पोस्ट ऑफिस सुरू झाल्यास या सर्व नागरिकांची मोठी सोय होऊ शकते.
वाकड, ताथवडे आणि पुनावळे हा परिसर झपाट्याने विकसित होत असून, येथे मोठ्या प्रमाणात निवासी संकुले, व्यावसायिक आस्थापना आणि विविध नागरी सुविधा विकसित होत आहेत. वाढत्या लोकसंख्येच्या तुलनेत सार्वजनिक सेवा-सुविधांचे जाळेही विस्तारण्याची गरज आहे. केवळ रस्ते, पाणीपुरवठा आणि वाहतूक व्यवस्थाच नव्हे, तर पोस्ट ऑफिससारख्या मूलभूत नागरी सुविधाही नागरिकांच्या परिसरात उपलब्ध असणे महत्त्वाचे आहे.
या पार्श्वभूमीवर पुनावळे आणि ताथवडे येथील सब-पोस्ट ऑफिससाठी महापालिकेने जागा उपलब्ध करून दिल्यास केंद्र सरकारच्या मंजूर सुविधांचे प्रत्यक्ष कार्यान्वयन होण्यास मदत होईल. तसेच स्वतंत्र पिनकोडच्या माध्यमातून निर्माण झालेल्या टपाल व्यवस्थेला अधिक प्रभावीपणे कार्य करता येईल. स्थानिक नागरिकांना त्यांच्या परिसरातच सेवा मिळाल्याने इतर पोस्ट ऑफिसवरील कामाचा ताण कमी होण्यासही मदत होऊ शकते.
नगरसेवक राहुल तानाजी कलाटे यांनी या विषयाचा सातत्याने पाठपुरावा करण्याची भूमिका स्पष्ट केली आहे. पुनावळे आणि ताथवडे येथील मंजूर पोस्ट ऑफिस लवकरात लवकर सुरू व्हावीत, तसेच वाकड परिसरातील टपाल सेवा अधिक सक्षम व्हावी, यासाठी महापालिका प्रशासनाने सकारात्मक निर्णय घ्यावा, अशी अपेक्षा त्यांनी व्यक्त केली आहे.
आता महापालिका प्रशासन या मागणीवर काय निर्णय घेते आणि पोस्ट ऑफिससाठी जागा उपलब्ध करून देण्याची प्रक्रिया कितपत वेगाने पूर्ण होते, याकडे वाकड, पुनावळे आणि ताथवडे परिसरातील नागरिकांचे लक्ष लागले आहे.