मुंबई (प्रतिनिधी) : राष्ट्रवादी काँग्रेस पक्षातील अंतर्गत नाराजी आणि नेतृत्वाच्या कार्यपद्धतीवरून सुरू असलेल्या चर्चांच्या पार्श्वभूमीवर बुधवारी मुंबईतील देवगिरी निवासस्थानी पक्षाच्या कोअर कमिटीची बैठक पार पडली. या बैठकीत पक्षातील महत्त्वाच्या नियुक्त्या आणि वरिष्ठ नेत्यांमधील समन्वयावर चर्चा झाल्याची माहिती आहे. यापुढे पक्षाचे महत्त्वाचे निर्णय कोअर कमिटीला विश्वासात घेऊनच घेतले जातील, अशी भूमिका पार्थ पवार यांनी मांडल्याचे वृत्त आहे.
प्रमुख नेत्यांची उपस्थिती
या बैठकीला उपमुख्यमंत्री सुनेत्रा पवार यांच्या अध्यक्षतेखाली पार्थ पवार, प्रदेशाध्यक्ष सुनील तटकरे, राष्ट्रीय कार्याध्यक्ष प्रफुल्ल पटेल, दिलीप वळसे पाटील, छगन भुजबळ, हसन मुश्रीफ, धनंजय मुंडे आणि समीर भुजबळ यांच्यासह पक्षाचे वरिष्ठ नेते उपस्थित होते.
गेल्या काही दिवसांपासून पार्थ पवार यांच्या कार्यपद्धतीवर आणि पक्षातील काही नियुक्त्यांबाबत वरिष्ठ नेत्यांमध्ये नाराजी असल्याची चर्चा राजकीय वर्तुळात सुरू होती. विशेषतः महत्त्वाचे संघटनात्मक निर्णय घेताना कोअर कमिटीतील ज्येष्ठ नेत्यांना विश्वासात घेतले जात नसल्याची तक्रार समोर आली होती.
झिशान सिद्दीकी आणि उमेश पाटील यांच्या नियुक्त्या कायम
पार्थ पवार यांच्या पुढाकाराने करण्यात आलेल्या झिशान सिद्दीकी यांची मुंबई अध्यक्षपदी आणि उमेश पाटील यांची राष्ट्रीय मुख्य प्रवक्तेपदी नियुक्ती कायम ठेवण्याची भूमिका बैठकीत घेण्यात आल्याचे वृत्त आहे. या दोघांना पुढील सहा महिने काम करण्याची संधी दिली जाणार असून, त्यानंतर त्यांच्या कामगिरीचा आढावा घेऊन पुढील निर्णय घेतला जाणार असल्याची माहिती सूत्रांनी दिली.
वरिष्ठ नेत्यांच्या पदांबाबत निर्णय नाही
दरम्यान, प्रदेशाध्यक्ष सुनील तटकरे आणि राष्ट्रीय कार्याध्यक्ष प्रफुल्ल पटेल यांच्या पदांबाबत या बैठकीत कोणताही अंतिम निर्णय झाल्याचे समोर आलेले नाही. त्यामुळे पक्षातील नेतृत्व आणि संघटनात्मक जबाबदाऱ्यांबाबतचा संभ्रम कायम आहे.
एकूणच, कोअर कमिटीला विश्वासात घेऊन निर्णय घेण्याच्या भूमिकेमुळे पक्षातील समन्वय सुधारण्याची अपेक्षा व्यक्त होत आहे. मात्र, वरिष्ठ नेत्यांची नाराजी पूर्णपणे दूर झाली आहे का आणि भविष्यात पक्षाचे निर्णय नेमके कोणत्या पद्धतीने घेतले जातील, हे आगामी घडामोडींनंतर स्पष्ट होणार आहे.
