Eknath Shinde यांच्या मार्गदर्शनाखाली सुरू असलेल्या राज्यव्यापी ‘शिवसंवाद दौरा’ उपक्रमाला नाशिक जिल्ह्यात मोठा प्रतिसाद मिळताना दिसत आहे. शिवसेना संसदीय गटनेते आणि कल्याण लोकसभेचे खासदार Shrikant Shinde यांनी आज इगतपुरी, देवळाली, दिंडोरी आणि कळवण विधानसभा मतदारसंघांमध्ये शिवसेना पदाधिकारी, युवासेना, महिला आघाडी आणि स्थानिक शिवसैनिकांसोबत सविस्तर आढावा बैठका घेत संघटनात्मक बांधणीला नवी दिशा दिली.
नाशिक शहरातून या दौऱ्याची सुरुवात करण्यात आली. आगामी जिल्हा परिषद आणि पंचायत समिती निवडणुकांच्या पार्श्वभूमीवर शिवसेना संघटना अधिक मजबूत करण्यासाठी बूथनिहाय नियोजन, गावपातळीवरील कार्यकर्त्यांची जबाबदारी, मतदार संपर्क अभियान आणि ग्रामीण भागात पक्षाची पकड अधिक बळकट करण्याबाबत यावेळी सखोल चर्चा झाली. नुकत्याच झालेल्या नगरपालिका आणि महानगरपालिका निवडणुकांमध्ये मिळालेल्या यशाची पुनरावृत्ती ग्रामीण भागात करण्याचा निर्धार पदाधिकाऱ्यांनी व्यक्त केला.
बैठकीदरम्यान आगामी मतदारयादी विशेष पुनरिक्षण मोहिमेच्या (SIR) संदर्भात विशेष नियोजन करण्यात आले. प्रत्येक बूथ आणि प्रत्येक मतदारापर्यंत पोहोचण्यासाठी कार्यकर्त्यांना सक्रिय राहण्याच्या सूचना देण्यात आल्या. नवीन मतदारांची नोंदणी, चुकीची नावे दुरुस्त करणे, बोगस नावे हटवणे आणि मतदारयादी अधिक अचूक करण्यासाठी पक्षाच्या प्रत्येक घटकाने समन्वयाने काम करण्याचे आवाहन करण्यात आले.
विशेषतः इगतपुरी आणि देवळाली विधानसभा मतदारसंघांमध्ये बूथनिहाय अधिकाऱ्यांची नियुक्ती जवळपास पूर्ण झाल्याची माहिती यावेळी देण्यात आली. युवासेना आणि महिला आघाडीच्या कार्यकर्त्यांनी गावागावात जाऊन मतदार नोंदणी मोहिमेला गती द्यावी तसेच कोणत्याही पात्र मतदाराचे नाव वगळले जाणार नाही याची दक्षता घ्यावी, असे निर्देश खासदार डॉ. श्रीकांत शिंदे यांनी दिले.
यावेळी डॉ. श्रीकांत शिंदे यांनी स्थानिक पदाधिकारी आणि शिवसैनिकांशी थेट संवाद साधत त्यांच्या अडचणी, सूचना आणि अपेक्षा जाणून घेतल्या. “शिवसेना ही सामान्य कार्यकर्त्यांची संघटना असून प्रत्येक कार्यकर्त्याचे मत आणि योगदान महत्त्वाचे आहे,” असे सांगत त्यांनी आगामी निवडणुकांसाठी सज्ज राहण्याचे आवाहन केले.
बैठकीत राज्याचे मंत्री Dadaji Bhuse, Uday Samant, Gulabrao Patil यांच्यासह आमदार Suhas Kande, Manisha Kayande, नाशिकचे उपमहापौर विलास शिंदे, शिवसेना सचिव भाऊसाहेब चौधरी, उपनेते अजय गोरस्ते, विजय करंजकर, जिल्हाप्रमुख अनिल ढिकले, माजी खासदार आनंद परांजपे, उन्मेष पाटील, माजी आमदार नरेंद्र दराडे, काशिनाथ मेंगाळ, जिल्हा संघटक योगेश म्हस्के, युवासेनेचे उत्तर महाराष्ट्र संपर्क प्रमुख अविष्कार भुसे आणि युवासेना जिल्हाप्रमुख सदानंद नवले यांच्यासह मोठ्या संख्येने पदाधिकारी उपस्थित होते. या दौऱ्यामुळे नाशिक जिल्ह्यात शिवसेनेची संघटनात्मक ताकद आणखी मजबूत होणार असल्याचे राजकीय विश्लेषकांचे मत आहे. ग्रामीण भागात पक्षाची पकड वाढवण्यासाठी सुरू असलेला हा ‘शिवसंवाद दौरा’ आगामी स्थानिक स्वराज्य संस्थांच्या निवडणुकांमध्ये महत्त्वाची भूमिका बजावणार असल्याची चर्चा राजकीय वर्तुळात सुरू आहे.
