कोंढवा येथे मोठी कारवाई: १३.६ लाखांच्या मेफेड्रॉनसह एक जण अटक, गुन्हे शाखेच्या अंमली पदार्थ विरोधी पथकाची यशस्वी धडक

पुणे शहरातील अंमली पदार्थ विरोधी मोहिमेअंतर्गत गुन्हे शाखेच्या अंमली पदार्थ विरोधी पथक २ (Anti-Narcotics Cell – 2) ने मोठी यशस्वी कारवाई करत १३ लाख ६० हजार रुपये किमतीचा मेफेड्रॉन (एम.डी.) अंमली पदार्थ जप्त करत एका आरोपीला अटक केली आहे.

ही कारवाई दि. २ जुलै २०२५ रोजी करण्यात आली असून, कोंढवा परिसरातील अहिल्यादेवी होळकर भाजी मंडई समोर संशयास्पद हालचाली करणाऱ्या व्यक्तीवर पोलिसांची नजर पडली. पोलीस अंमलदार चेतन गायकवाड यांना मिळालेल्या गोपनीय माहितीनुसार, अंमली पदार्थांची विक्री होत असल्याची शंका होती.

त्यानुसार पोलीस निरीक्षक श्री. सुदर्शन गायकवाड, सहा. पोलीस निरीक्षक नितीनकुमार नाईक यांच्या नेतृत्वाखाली पोलिसांचे पथक कोंढवा येथे रवाना झाले. सापळा रचून त्यांनी इसम सुनिल बिश्नाराम चौधरी (वय २०, रा. खडी मशिन चौक, रिलायन्स मार्ट मागे, कोंढवा, पुणे) याला रंगेहाथ अटक केली.

त्याच्याकडून ६७ ग्रॅम मेफेड्रॉन (एम.डी.) अंमली पदार्थ, तसेच इतर साहित्यासह एकूण १३,६०,०००/- रुपये किमतीचा मुद्देमाल हस्तगत करण्यात आला आहे.

सुनिल चौधरी याच्याविरुद्ध कोंढवा पोलीस ठाण्यात गु. र. नं. ५१७/२०२५ अन्वये एन.डी.पी.एस. अॅक्टच्या कलम ८(क), २१(क) नुसार गुन्हा दाखल करण्यात आला आहे.

ही कारवाई पुढील अधिकाऱ्यांच्या मार्गदर्शनाखाली पार पडली:

• मा. अपर पोलीस आयुक्त (गुन्हे) श्री. पंकज देशमुख

• मा. पोलीस उपआयुक्त (गुन्हे) श्री. निखिल पिंगळे

• मा. सहाय्यक पोलीस आयुक्त (गुन्हे – २) श्री. राजेंद्र मुळीक

कारवाईत सहभागी अधिकारी व अंमलदार:

पोलीस निरीक्षक सुदर्शन गायकवाड, सहा. पो. नि. नितीनकुमार नाईक, पोलीस अंमलदार चेतन गायकवाड, संदिप जाधव, आझाद पाटील, साहिल शेख, अझिम शेख, प्रफुल्ल मोरे, शेखर खराडे.

ही कारवाई अंमली पदार्थ विक्रीच्या वाढत्या घटनांना रोखण्यासाठी एक मोठे पाऊल मानले जात आहे. पुणे शहर पोलीस दलाने आणखी कठोर मोहिमा राबवण्याचे संकेत दिले असून, अंमली पदार्थांच्या विरोधात “झिरो टॉलरन्स” धोरण राबवले जात आहे.