महाराष्ट्राच्या राजकारणात आजचा दिवस ऐतिहासिक ठरणार आहे. तब्बल २० वर्षांनंतर शिवसेना (उद्धव बाळासाहेब ठाकरे गट) प्रमुख उद्धव ठाकरे आणि महाराष्ट्र नवनिर्माण सेनेचे अध्यक्ष राज ठाकरे हे पुन्हा एकदा एकाच व्यासपीठावर वरळीतील एनएससीआय डोम येथे एकत्र येणार आहेत. ही ‘व्हिक्टरी रॅली’ मराठी भाषेच्या सन्मानासाठी लढलेल्या संघर्षाचा आणि त्यात मिळालेल्या यशाचा आनंद साजरा करणारी आहे.
मागील भेट आणि दूरावलेली वाट: याआधी दोघे बंधू शेवटचे 2005 साली मालवण पोटनिवडणुकीच्या प्रचारासाठी एकत्र दिसले होते. त्या प्रचारानंतर राज ठाकरे यांनी शिवसेनेला अलविदा करत 2006 मध्ये ‘महाराष्ट्र नवनिर्माण सेने’ची स्थापना केली होती. त्यानंतर दोघांनी कधीही एकत्र व्यासपीठ सामायिक केलं नव्हतं.
आज पुन्हा मराठीसाठी एकत्र! महाराष्ट्र सरकारच्या त्रिभाषा धोरणाविरोधात उद्धव आणि राज ठाकरे यांनी एकत्रित भूमिका घेतली. हिंदी सक्तीच्या धोरणाविरोधात दोघांनीही आवाज उठवल्यानंतर सरकारने यावर यू-टर्न घेत जीआर रद्द केला. या विजयाचा मराठी माणसाच्या आत्मसन्मानाचा विजय म्हणून गौरव करत आज दोघेही रॅलीद्वारे जनतेसमोर येणार आहेत.
राजकारण बाजूला ठेवत एकत्र येण्याचा निर्णय: विशेष म्हणजे या रॅलीसाठी पक्षीय झेंडे, निवडणूक चिन्ह, स्कार्फ, बॅनर, पोस्टर यांचा वापर न करण्याचा निर्णय दोन्ही पक्षांनी घेतला आहे. या निर्णयामुळे रॅलीला राजकीय पेक्षा सांस्कृतिक आणि भाषिक अस्मितेचा रंग प्राप्त झाला आहे.
लाखोंचा उत्साह: वरळीतील एनएससीआय डोम येथे होणाऱ्या या रॅलीसाठी ५० हजार ते १ लाख नागरिक उपस्थित राहतील, असा अंदाज शिवसेना (UBT) नेते अरविंद सावंत यांनी व्यक्त केला. वरळी हा आदित्य ठाकरे यांचा विधानसभा मतदारसंघ असून येथेच ही भव्य रॅली आयोजित करण्यात आली आहे.
एकत्र निवडणूक लढवणार? राज आणि उद्धव ठाकरे यांचं आजचं एकत्र येणं हे फक्त भाषेसाठीच की राजकीय भविष्याचा एक नवा अध्याय? याबाबत उत्सुकता शिगेला पोहोचली आहे. “देवाची इच्छा असेल, तर ते होईल,” असं मत सावंत यांनी व्यक्त करत एक शक्यता खुली ठेवली आहे.
भावना, इतिहास आणि आशा: आजचा दिवस केवळ एका रॅलीपुरता मर्यादित नाही. तो ठाकरे कुटुंबातील एकतेचा, मराठी अस्मितेचा आणि जनभावनेचा विजय दर्शवणारा आहे. गेल्या दोन दशकांतील दुही, संघर्ष आणि राजकीय टोकाचे अनुभव विसरून पुन्हा एकत्र येण्याचा प्रयत्न लोकांच्या मनात आशेचा किरण निर्माण करत आहे.
