पिंपरी-चिंचवड : फुगेवाडी, दापोडी आणि हडपसर परिसरात बनावट व विषारी हातभट्टी दारू सेवनामुळे तब्बल १९ निष्पाप नागरिकांचा मृत्यू झालेल्या धक्कादायक घटनेचे पडसाद आता राज्याच्या पावसाळी अधिवेशनात उमटणार आहेत. चिंचवड विधानसभा मतदारसंघाचे भाजप आमदार शंकर जगताप यांनी या अत्यंत गंभीर आणि संवेदनशील प्रकरणी विधानसभेत लक्षवेधी सूचना दाखल केली असून या प्रकरणाची सखोल चौकशी, दोषींवर कठोर कारवाई आणि अवैध दारू माफियांचे संपूर्ण जाळे उद्ध्वस्त करण्याची मागणी ते अधिवेशनात करणार आहेत.
राज्याचे पावसाळी अधिवेशन २२ जूनपासून मुंबई येथे सुरू होत असून, या अधिवेशनातील पहिल्याच महत्त्वाच्या विषयांमध्ये फुगेवाडी विषारी दारूकांडाचा समावेश होण्याची शक्यता आहे. या प्रकरणामुळे संपूर्ण पिंपरी-चिंचवड, पुणे आणि राज्यभरात संतापाची लाट उसळली होती. गरीब आणि कष्टकरी कुटुंबांतील अनेकांनी या दुर्घटनेत आपले कुटुंबप्रमुख, वडील, भाऊ आणि जवळची माणसे गमावली.
१९ जणांचा दुर्दैवी मृत्यू; अनेक कुटुंबे उद्ध्वस्त
२८ मे ते १ जून २०२६ या कालावधीत फुगेवाडी, दापोडी आणि हडपसर परिसरात विषारी गावठी दारू सेवन केल्याने १९ जणांचा मृत्यू झाला होता. या घटनेनंतर अनेक जण गंभीर अवस्थेत रुग्णालयात दाखल झाले होते. मृतांमध्ये रोजंदारी करणारे कामगार, हातावर पोट असलेले नागरिक आणि आर्थिकदृष्ट्या दुर्बल घटकांतील व्यक्तींचा समावेश असल्याचे समोर आले.
या घटनेमुळे अनेक कुटुंबांवर दुःखाचा डोंगर कोसळला असून काही घरांमध्ये कमावता व्यक्ती गमावल्याने उदरनिर्वाहाचा प्रश्न निर्माण झाला आहे. त्यामुळे या कुटुंबांना न्याय मिळावा, दोषींना कठोर शिक्षा व्हावी आणि अशा घटना पुन्हा घडू नयेत यासाठी जनतेकडून सातत्याने मागणी होत आहे.
दारूमध्ये प्राणघातक रसायनांची भेसळ?
प्राथमिक तपासात हातभट्टी दारूमध्ये काळा गूळ, उसाची मळी यांच्यासोबत नशेची तीव्रता वाढवण्यासाठी विविध धोकादायक रसायनांची भेसळ करण्यात आल्याचा संशय व्यक्त करण्यात आला आहे. नवसागर, युरिया, ऑक्सिटोसिनसारखी रसायने तसेच अत्यंत घातक मिथेनॉलचा वापर करण्यात आल्याने या दारूचे विषात रूपांतर झाले आणि त्यातून मृत्यूचे तांडव घडल्याचे आरोप करण्यात येत आहेत.
तज्ज्ञांच्या मते, मिथेनॉलयुक्त दारूचे सेवन केल्यास अंधत्व, मेंदूवर परिणाम, अवयव निकामी होणे आणि मृत्यू यांसारखे गंभीर परिणाम होऊ शकतात. त्यामुळे या संपूर्ण प्रकरणाची वैज्ञानिक आणि न्यायवैद्यकीय तपासणी होणे अत्यावश्यक असल्याचे मत व्यक्त केले जात आहे.
विधानसभेत सरकारला धारेवर धरणार
आमदार शंकर जगताप यांनी या प्रकरणात अनेक गंभीर प्रश्न उपस्थित केले आहेत. अवैध दारू निर्मिती आणि विक्रीचे जाळे इतक्या मोठ्या प्रमाणावर सुरू असताना संबंधित यंत्रणांना याची माहिती नव्हती का? स्थानिक स्तरावर कोणाचे संरक्षण या अवैध धंद्यांना मिळत होते का? यामध्ये सहभागी असलेले मुख्य सूत्रधार कोण आहेत? अशा अनेक प्रश्नांची उत्तरे सरकारकडून मागितली जाणार आहेत.
तसेच या प्रकरणातील सर्व आरोपींना तातडीने अटक करून त्यांच्यावर कठोर कायदेशीर कारवाई करण्याची, संबंधित अधिकाऱ्यांची जबाबदारी निश्चित करण्याची आणि मृतांच्या कुटुंबीयांना योग्य आर्थिक मदत व पुनर्वसन देण्याची मागणीही अधिवेशनात केली जाणार असल्याचे सांगितले जात आहे.
अवैध दारू माफियांविरोधात व्यापक मोहीमेची मागणी
या दुर्घटनेनंतर राज्यभरातील अवैध हातभट्टी दारू व्यवसायावर पुन्हा एकदा प्रश्नचिन्ह निर्माण झाले आहे. अनेक भागांमध्ये अजूनही बेकायदेशीर दारू निर्मिती सुरू असल्याचे आरोप होत असून पोलिस, राज्य उत्पादन शुल्क विभाग आणि स्थानिक प्रशासनाने संयुक्त मोहीम राबवून अशा अवैध धंद्यांचे संपूर्ण उच्चाटन करावे, अशी मागणी नागरिकांकडून केली जात आहे.
जनतेत संताप, न्यायाची अपेक्षा
फुगेवाडी दारूकांडामुळे नागरिकांमध्ये तीव्र संतापाची भावना असून दोषींना कठोर शिक्षा मिळावी आणि भविष्यात अशा घटना रोखण्यासाठी ठोस धोरण आखले जावे, अशी मागणी होत आहे. आगामी अधिवेशनात या प्रकरणावर होणारी चर्चा आणि सरकारची भूमिका याकडे संपूर्ण राज्याचे लक्ष लागले आहे.
या भीषण दुर्घटनेत मृत्यूमुखी पडलेल्या १९ निष्पाप नागरिकांना न्याय मिळवून देण्यासाठी आणि अवैध दारू माफियांना कायमचा आळा घालण्यासाठी विधानसभेत जोरदार आवाज उठविला जाणार असल्याने हे प्रकरण पुन्हा एकदा राज्याच्या राजकीय आणि सामाजिक चर्चेच्या केंद्रस्थानी आले आहे.
