वानवडी परिसरात अल्पवयीन वाहनचोरांचा पर्दाफाश; तीन दुचाकी जप्त, पोलीसांची सतर्क कारवाई

पुणे | प्रतिनिधी

पुणे शहरातील वानवडी पोलीस ठाण्याच्या तपास पथकाने तत्पर आणि प्रभावी कारवाई करत अल्पवयीन दोन बालकांना वाहनचोरीच्या प्रकरणात ताब्यात घेतले आहे. ही कारवाई २६ जानेवारी २०२६ रोजी रामटेकडी औद्योगिक परिसरात नियमित पोलीस पेट्रोलिंगदरम्यान करण्यात आली.

पेट्रोलिंग सुरू असताना दोन तरुण संशयास्पद हालचाली करत असल्याची माहिती पोलीसांना मिळाली. त्यानुसार तात्काळ कारवाई करत पोलीसांनी त्यांना थांबवून चौकशी केली. चौकशीत ही दोन्ही मुले अल्पवयीन असल्याचे निष्पन्न झाले. सखोल विचारपूस केली असता त्यांनी तीन चोरी केलेल्या दुचाकींबाबत कबुली दिली. यामध्ये निळ्या व काळ्या रंगाच्या अ‍ॅक्टिवा तसेच एक पांढऱ्या रंगाची दुचाकी असल्याचे समोर आले.

तपासादरम्यान धक्कादायक माहिती समोर आली की, ही चोरी केवळ हौस आणि थोडे पैसे मिळवण्याच्या उद्देशाने करण्यात आली होती. विशेष म्हणजे चोरी केलेल्या वाहनांपैकी एक दुचाकी पोलीस कर्मचाऱ्यांची असल्याचे लक्षात येताच, घाबरून बालकांनी ती गाडी पुन्हा फिर्यादीच्या घराजवळ सुरक्षित ठिकाणी ठेवली होती.

ही घटना आजच्या घडीला अल्पवयीन मुलांमध्ये वाढत असलेल्या चुकीच्या सवयी, हौसेखातर गुन्हे करण्याची प्रवृत्ती आणि दिशाहीनतेचे गंभीर चित्र दाखवते. लहान वयातच गुन्हेगारीकडे वळणारी पिढी समाजासाठी चिंतेचा विषय ठरत आहे.

सदर कारवाईचे नेतृत्व सहाय्यक पोलीस निरीक्षक उमाकांत महाडिक आणि पोलीस उपनिरीक्षक अल्फाज शेख यांनी केले. त्यांच्या मार्गदर्शनाखालील पथकातील पोलीस अमलदारांनी अत्यंत नियोजनबद्ध पद्धतीने सापळा रचून ही कारवाई यशस्वी केली. चोरीच्या सर्व दुचाकी जप्त करण्यात आल्याने वानवडी परिसरातील वाहनचोरीच्या घटनांना आळा बसला आहे.

पोलीसांच्या सतर्कतेमुळे मोठे आर्थिक नुकसान होण्यापासून नागरिक वाचले असून, ही कारवाई शहरातील सुरक्षिततेच्या दृष्टीने दिलासादायक ठरली आहे. याचबरोबर, पालकांनी आपल्या मुलांच्या हालचालींवर लक्ष ठेवणे, त्यांना योग्य मार्गदर्शन देणे आणि शाळा तसेच स्थानिक प्रशासनाने सामाजिक व शैक्षणिक उपक्रमांतून युवकांना सकारात्मक दिशा देणे अत्यंत गरजेचे असल्याचे या घटनेतून पुन्हा एकदा अधोरेखित झाले आहे.