आयुक्त शेखर सिंह यांच्या बदलीपूर्व मंजूर कामांची माहिती मागवली! तुषार कामठे यांची पारदर्शकतेसाठी ठाम भूमिका — महापालिकेतील घोटाळ्यांवर नव्या चौकशीची मागणी जोरात
पिंपरी चिंचवड महानगरपालिकेतील कामकाजावर पुन्हा एकदा प्रश्नचिन्ह निर्माण झाले आहे. आयुक्त शेखर सिंह यांच्या बदलीनंतर अनेक प्रलंबित आणि मंजूर कामांबाबत अनियमिततेचे आरोप पुढे आले आहेत. विशेष म्हणजे, या सर्व संशयास्पद हालचालींवर लक्ष ठेवण्यासाठी राष्ट्रवादी काँग्रेस शरदचंद्र पवार पक्षाचे शहराध्यक्ष तुषार कामठे यांनी पुढाकार घेतला आहे.
तुषार कामठे यांनी आयुक्त शेखर सिंह यांच्या बदलीपूर्व ३० दिवसांत मंजूर झालेल्या सर्व भांडवली कामे आणि टेंडरची माहिती मागवली आहे. त्यांनी ही मागणी माहिती अधिकार कायद्यांतर्गत (RTI) पिंपरी चिंचवड महापालिकेच्या लेखा विभागाकडे लेखी स्वरूपात केली आहे.
कामठे यांनी पत्रात स्पष्ट नमूद केले आहे की, १ सप्टेंबर ते ५ ऑक्टोबर या कालावधीत मंजूर झालेल्या सर्व भांडवली कामांची यादी — विभागाचे नाव, कामाचे स्वरूप, अंदाजपत्रक रक्कम, मंजुरी दिनांक अशा तपशीलांसह — सार्वजनिक करण्यात यावी. त्याचप्रमाणे या कालावधीत मंजूर झालेल्या सर्व टेंडरची माहिती, मंजूर कंत्राटदाराचे नाव, निविदा क्रमांक, मंजुरी दिनांक आणि विभागाचे नाव यासह सादर करावी अशी मागणीही करण्यात आली आहे.
याशिवाय, तातडीने मंजूर केलेल्या किंवा विशेष आदेशाने पार पडलेल्या कामांचा स्वतंत्र तपशील तसेच TDR फाईल्सचा पूर्ण अहवाल सादर करण्याची मागणीही करण्यात आली आहे. कामठे यांनी ही माहिती PDF किंवा सॉफ्ट कॉपी स्वरूपात ईमेलद्वारे देण्याची विनंती केली आहे.
अलीकडेच पिंपरी चिंचवडमध्ये चिखली-कुदळवाडीतील संशयास्पद कारवाई, वाकडमधील TDR घोटाळा, विकास आराखड्यातील आतबट्ट्याचे व्यवहार, कोट्यवधींच्या मोडलेल्या ठेवी, संशयास्पद निविदा आणि सुशोभीकरणाच्या नावाखालील गैरव्यवहार अशा अनेक गंभीर प्रकरणांनी वाद निर्माण केला आहे. नागरिक आणि स्थानिक कार्यकर्ते या घटनांवर संपूर्ण पारदर्शकतेची मागणी करत आहेत.
कामठे यांनी सांगितले की, “महापालिकेच्या निधीचा वापर योग्य पद्धतीने झाला का, हे जनतेला माहीत असणे आवश्यक आहे. आम्ही कोणावरही व्यक्तिगत आरोप करत नाही, पण पारदर्शकता ही प्रशासनाची प्राथमिक जबाबदारी आहे.”
या घडामोडींमुळे पिंपरी चिंचवड महानगरपालिकेच्या कारभारावर पुन्हा एकदा राजकीय आणि प्रशासकीय वर्तुळात चर्चा रंगली असून, पुढील काही दिवसांत या प्रकरणात मोठे उघड होण्याची शक्यता व्यक्त केली जात आहे.
