वारजे माळवाडी परिसरात स्थानिक गुन्हे शाखेच्या पथकाने केलेल्या तत्परतेमुळे गंभीर स्वरूपाचा गुन्हा टळला आहे. पोलिसांना मिळालेल्या गोपनीय माहितीच्या आधारे रेकॉर्डवरील गुन्हेगारास गावठी पिस्टल आणि काडतूसासह जेरबंद करण्यात आले. ही कारवाई १२ जुलै २०२५ रोजी करण्यात आली.
सदर गुन्हेगाराचे नाव विकी ऊर्फ गंग्या विष्णू आखाडे (वय २७), रा. सहयोग नगर, वारजे माळवाडी असे असून त्याच्या अंगझडतीत ४०,०००/- किंमतीचे देशी बनावटीचे पिस्टल आणि ५००/- किंमतीचे एक जिवंत काडतूस मिळून आले. पोलिसांनी लगेचच गुन्हा दाखल करत आरोपीस अटक केली.
हा आरोपी यापूर्वी खुनाचा प्रयत्न, बेकायदेशीर शस्त्र बाळगणे, वाहनांची तोडफोड अशा गंभीर गुन्ह्यांमध्ये सहभागी असल्याचे निष्पन्न झाले आहे. त्यामुळे पोलीस विभागाला याचे हालचालींवर विशेष लक्ष ठेवावे लागत होते.
या कारवाईमुळे स्थानिक नागरिकांमध्ये विश्वासाची भावना निर्माण झाली आहे. वारजे माळवाडी पोलीस स्टेशनच्या पथकाने वेळीच केलेली ही कारवाई गुन्हेगारी प्रवृत्तीला चाप लावणारी आहे. पोलिसांची तत्परता, सतर्कता आणि गुन्हेगारी विरोधातील निष्ठा याचे हे उत्तम उदाहरण ठरले आहे.
या यशस्वी कारवाईचे श्रेय मा. पोलीस उप-आयुक्त संभाजी कदम, सहायक पोलीस आयुक्त भाऊसाहेब पटारे, वरिष्ठ पोलीस निरीक्षक विश्वजीत काईंगडे, पोलीस निरीक्षक प्रकाश धेंडे, निलेश बडाख यांच्यासह तपास पथकातील पोलीस उपनिरीक्षक संजय नरळे, सिध्देश्वर रायगोंडा, अंमलदार अमोल सुतकर, योगेश वाघ, बालाजी काटे, अमित जाधव, सागर कुंभार, निखील तांगडे, अमित शेलार, शरद पोळ, अमोल झणझणे यांना दिले जाते.
या घटनेने पुन्हा एकदा स्पष्ट झाले की, पुणे पोलिस कोणत्याही परिस्थितीत गुन्हेगारीला थारा देणार नाहीत आणि नागरिकांच्या सुरक्षेसाठी ते २४ तास सज्ज आहेत.
