पुणे: पुणे शहरातील काळेपडळ पोलीस ठाणे व अन्न व औषध प्रशासन विभागाने (FDA) संयुक्तरित्या मोठी कारवाई करत तब्बल ७६,४४,६५०/- रुपयांचा प्रतिबंधित गुटखा आणि वाहतूक साधने जप्त केली आहेत. या कारवाईमुळे अवैध गुटखा विक्रीचा मोठा कट समोर आला आहे.
गुप्त माहितीवरून पोलिसांची तत्काळ कारवाई
अन्न व औषध प्रशासन विभागाच्या गुप्त वार्ता विभागाने मिळवलेल्या माहितीच्या आधारे काळेपडळ पोलिसांनी तातडीने पथक स्थापन केले. पुण्यातील वडाचीवाडी रोड, घुले वस्ती, उंड्री येथे असलेल्या एका गोडाऊनवर छापा टाकण्यात आला. या ठिकाणी मोठ्या प्रमाणात विविध ब्रँडच्या सुगंधित तंबाखू व गुटख्याचा साठा आढळून आला.
मुख्य आरोपीला अटक – मोठ्या रॅकेटचा पर्दाफाश?
कारवाईदरम्यान, गोडाऊनमध्ये उपस्थित असलेला संपतराज पेमाराम चौहान (वय ३८, रा. इस्कॉन मंदिराच्या पाठीमागे, कोंढवा, पुणे) यास ताब्यात घेण्यात आले. चौकशीत त्याच्याकडून ६४,४४,६५०/- रुपयांचा प्रतिबंधित गुटखा आणि १२,००,०००/- रुपये किंमतीच्या चार वाहतूक गाड्या जप्त करण्यात आल्या.
या प्रकरणी काळेपडळ पोलीस ठाण्यात गुन्हा दाखल करण्यात आला आहे. गुन्हा भादंवि कलम १२३, २७४, २७५, २२३, ३(५) आणि अन्न सुरक्षा व मानके अधिनियम २००६ मधील विविध कलमांखाली दाखल करण्यात आला आहे.
पोलीस तपास सुरू – आणखी आरोपींवर कारवाई होण्याची शक्यता
अवैध गुटखा विक्री प्रकरणात आणखी मोठे मासे सापडण्याची शक्यता असून, पोलिसांनी आरोपींच्या नेटवर्कचा तपास सुरू केला आहे. पोलीस उपनिरीक्षक अनिल निबाळकर या प्रकरणाचा अधिक तपास करत आहेत.
वरिष्ठ अधिकाऱ्यांचे मार्गदर्शन – यशस्वी मोहीम
ही महत्त्वपूर्ण कारवाई पोलीस उप आयुक्त परिमंडळ ५ श्री. राजकुमार शिंदे यांच्या मार्गदर्शनाखाली पार पडली. सहाय्यक पोलीस आयुक्त धन्यकुमार गोडसे, वरिष्ठ पोलीस निरीक्षक मानसिंग पाटील, गुन्हे शाखेचे निरीक्षक अमर काळंगे, सहायक पोलीस निरीक्षक प्रविण अब्दागिरे, तसेच अन्न व औषध प्रशासन विभागाचे अधिकारी यांच्या पथकाने ही संयुक्त कारवाई केली.
पुणेकरांसाठी महत्त्वाचा इशारा!
गुटखा आणि सुगंधित तंबाखूचे सेवन आरोग्यास हानिकारक असून, सरकारने त्यावर बंदी घातली आहे. तरीही, काही व्यापारी गुपचूप मोठ्या प्रमाणात गुटखा विक्रीचा व्यवसाय करत आहेत. पोलीस आणि प्रशासन अशा अवैध धंद्यांवर निर्बंध आणण्यासाठी सातत्याने कारवाई करत आहेत.
