पुण्यातील लोहगड मृत्यू प्रकरणाने दिवसेंदिवस अधिकच गंभीर वळण घेतले असून आता या प्रकरणात आणखी एका तरुणाची एन्ट्री झाल्याने तपासाला नवे वळण मिळाले आहे. केतन अग्रवालच्या मृत्यूमागे कट रचल्याच्या आरोपावरून त्याची नियोजित वधू सिया गोयल आणि तिचा कथित प्रियकर चेतन चौधरी यांना अटक करण्यात आली आहे. मात्र आता नीरज कुमार नावाच्या व्यक्तीचे नाव समोर आल्याने या संपूर्ण प्रकरणात आणखी कोणाचा सहभाग होता का, याचा तपास सुरू झाला आहे.
तपास यंत्रणांच्या माहितीनुसार, घटनेच्या दिवशी चेतन चौधरीने वापरलेला मोबाईल फोन त्याच्या नावावर नोंदणीकृत नसून तो नीरज कुमारच्या मालकीचा असल्याचे समोर आले आहे. विशेष म्हणजे चेतनने स्वतःचा मोबाईल घरी ठेवून नीरजचा फोन वापरल्याची माहिती तपासातून समोर आली आहे. त्यामुळे हा प्रकार केवळ योगायोग होता की पुरावे लपवण्याचा प्रयत्न, याची चौकशी पोलिसांकडून केली जात आहे.
नीरज कुमार हा चेतनच्या हाताखाली काम करत असल्याचे समोर आले असून त्याला चौकशीसाठी बोलावण्यात आले आहे. तो या कटाचा भाग होता की केवळ त्याचा फोन वापरण्यात आला, याचा शोध तपास अधिकारी घेत आहेत. त्यामुळे नीरज या प्रकरणात साक्षीदार ठरणार की संशयित, याकडे सर्वांचे लक्ष लागले आहे.
दरम्यान, या धक्कादायक घटनेनंतर सिया गोयलच्या कुटुंबावरही मोठा मानसिक आघात झाला आहे. सियाच्या अटकेनंतर तिच्या वडिलांची प्रकृती बिघडल्याचे समोर आले असून त्यांना उच्च रक्तदाबाचा त्रास झाल्याने खासगी रुग्णालयात दाखल करण्यात आले आहे. त्यांच्या प्रकृतीबाबत कुटुंबीयांमध्ये चिंतेचे वातावरण आहे.
तपासादरम्यान समोर आलेल्या माहितीनुसार, साखरपुड्यानंतर केतन अग्रवालला सिया गोयलच्या वागणुकीबाबत काही शंका निर्माण झाल्या होत्या. त्याने अनेकदा कुटुंबीयांकडे याबाबत चिंता व्यक्त केली होती. मात्र सिया ही ओळखीतील आणि नात्यातील मुलगी असल्याने तिच्याबद्दल कोणतीही शंका घेऊ नये, असे सांगून कुटुंबीयांनी त्याची समजूत काढली होती.
केतनचे वडील विशाल अग्रवाल यांनी दिलेल्या तक्रारीनुसार, केतनने एकदा थेट विचारले होते की, “सियाबद्दल संपूर्ण माहिती घेतली आहे का?” त्यावेळी कुटुंबीयांनी सर्व पडताळणी केल्याचे सांगत त्याला आश्वस्त केले होते. मात्र त्यानंतर सिया वारंवार किरकोळ कारणांवरून वाद घालत असल्याचे केतनने घरच्यांना सांगितले होते.
याच काळात सिया सतत चेतन चौधरी नावाच्या व्यक्तीचा उल्लेख करत असल्याचे आणि तिचा फोन अनेकदा व्यस्त लागत असल्याचेही केतनच्या लक्षात आले होते. त्यामुळे तिचे इतर कोणाशी प्रेमसंबंध असावेत, असा संशय त्याने व्यक्त केला होता. मात्र घरच्यांनी हा गैरसमज असू शकतो असे सांगत त्याला शांत केले होते.
या प्रकरणातील आणखी एक धक्कादायक बाब म्हणजे बाली येथे होणारे प्री-वेडिंग शूट. जूनच्या पहिल्या आठवड्यात केतन आणि सिया इंडोनेशियातील बाली येथे जाणार होते. मात्र मुंबईला पोहोचल्यानंतर केतनचा पासपोर्ट अचानक गायब झाल्याचे समोर आले आणि संपूर्ण दौरा रद्द झाला.
तपासात समोर आलेल्या माहितीनुसार, पुणे-मुंबई प्रवासादरम्यान एका फूड मॉलमध्ये सियाने केतनचा पासपोर्ट स्वच्छतागृहात फ्लश केल्याचा संशय व्यक्त केला जात आहे. जर हे सत्य ठरले, तर केतनच्या हालचालींवर नियंत्रण ठेवण्यासाठी किंवा पुढील कटाची तयारी म्हणून हे पाऊल उचलण्यात आले होते का, याचा तपास पोलीस करत आहेत.
या संपूर्ण प्रकरणामुळे पुण्यासह राज्यभरात मोठी खळबळ उडाली असून प्रेमसंबंध, विश्वासघात आणि नियोजनबद्ध कट यांचे धक्कादायक पैलू समोर येत आहेत. डिजिटल पुरावे, कॉल रेकॉर्ड्स, मोबाईल लोकेशन आणि संबंधित व्यक्तींच्या जबाबांच्या आधारे पोलिस तपास वेगाने सुरू असून येत्या काही दिवसांत आणखी धक्कादायक खुलासे होण्याची शक्यता वर्तवली जात आहे.
केतन अग्रवाल मृत्यू प्रकरण हे आता केवळ संशयास्पद मृत्यूचे प्रकरण राहिले नसून, त्यामागील संपूर्ण कटकारस्थान उघड करण्यासाठी तपास यंत्रणा सर्व बाजूंनी तपास करत आहेत. या प्रकरणातील प्रत्येक नव्या खुलाशासोबत अनेक अनुत्तरित प्रश्न समोर येत असून त्यांची उत्तरे मिळण्याची प्रतीक्षा सर्वांनाच लागली आहे.
