दादर ते चर्चगेट लोकलमधून राज ठाकरेंचा प्रवास; विरोधी पक्षांच्या मोर्चाला मिळाला जनतेचा जबरदस्त प्रतिसाद!

मुंबई : महाराष्ट्र नवनिर्माण सेनेचे अध्यक्ष राज ठाकरे यांनी आज दादर ते चर्चगेट या मार्गावर लोकल ट्रेनने प्रवास करत विरोधी पक्षांच्या मोर्चात सहभाग नोंदवला. हा प्रवास प्रतीकात्मक असला तरी, त्याने मुंबईच्या राजकारणात नवचैतन्य निर्माण केलं आहे. लोकलमध्ये राज ठाकरे यांना पाहण्यासाठी प्रवाशांची मोठी गर्दी उसळली होती.

विरोधी पक्षांच्या एकत्र मोर्चाला आज विशेष महत्त्व मिळालं आहे. मनसे, शिवसेना (उद्धव ठाकरे गट), शरद पवारांचा राष्ट्रवादी काँग्रेस गट आणि काँग्रेस पक्ष या सर्वांनी एकत्र येऊन “व्होटचोरी आणि निवडणूक गैरव्यवहार विरोधात” आवाज उठवला आहे. मोर्चाची सुरुवात दादरहून झाली असून, अंतिम टप्पा चर्चगेट येथील बृहन्मुंबई महानगरपालिकेच्या मुख्यालयासमोर होणार आहे.

राज ठाकरे यांच्या लोकल प्रवासामुळे सामान्य मुंबईकरांशी जोडलेपणाचं प्रतीकात्मक दर्शन घडले. अनेक प्रवाशांनी त्यांच्या मोबाईलमध्ये व्हिडीओ आणि फोटो घेत उत्साहाने “राज ठाकरे जिंदाबाद”च्या घोषणा दिल्या.

दरम्यान, या मोर्चासाठी मुंबई पोलिसांकडून मोठी सुरक्षा व्यवस्था ठेवण्यात आली आहे. चर्चगेट परिसरात पोलीस तैनात असून, ट्रॅफिक डायव्हर्जनचीही व्यवस्था केली आहे.

राजकीय निरीक्षकांच्या मते, हा मोर्चा विरोधी पक्षांच्या एकतेचं आणि जनतेच्या विश्वास परत मिळवण्याचं प्रतिक ठरू शकतो. मुंबईतील जनतेत या मोर्च्याबद्दल प्रचंड उत्सुकता दिसून येत आहे.