पुणे, हडपसर:- हडपसर पोलिसांनी एक मोठी कारवाई करत देशी बनावटीचा कट्टा आणि एक जिवंत काडतूस जप्त करत संशयित चिराग संजय सर्जेराव (वय २३, रा. म्हसोबा वस्ती, मांजरी) यास ताब्यात घेतले आहे. गुन्हेगारी प्रवृत्तीच्या कारवाया रोखण्यासाठी पोलिसांनी केलेली ही धडाकेबाज कारवाई परिसरातील नागरिकांमध्ये गुन्हेगारीविरोधातील विश्वास वाढवणारी ठरली आहे.
कारवाईची पार्श्वभूमी :
दि. २२ एप्रिल रोजी पोलीस उप-निरीक्षक हसन मुलाणी, पोलीस अंमलदार दिपक कांबळे, अभिजीत राऊत, महेश चव्हाण, तुकाराम झुंजार यांचे पथक हडपसर पोलीस स्टेशनच्या हद्दीत अवैध धंदे आणि वाहन चोरी रोखण्यासाठी नियमित पेट्रोलिंग करत होते.
त्यावेळी पोलीस अंमलदार महेश चव्हाण आणि अभिजीत राऊत यांना बातमीदारामार्फत माहिती मिळाली की, एक इसम अवैध शस्त्र घेऊन दखलपात्र गुन्ह्याचा प्रयत्न करण्याच्या उद्देशाने परिसरात वावरत आहे. सदर माहिती वरिष्ठ पोलीस निरीक्षक श्री. संजय मोगले यांना देण्यात आली आणि त्यांच्या मार्गदर्शनाखाली पथकाने तत्काळ सापळा रचून संशयित चिराग यास मांजरी परिसरातून ताब्यात घेतले.
झडती व गुन्हा दाखल :
संशयिताची दोन पंचासमक्ष अंगझडती घेतली असता, त्याच्याकडून १ देशी बनावटीचा कट्टा व १ जिवंत काडतूस जप्त करण्यात आले. यासंदर्भात हडपसर पोलीस स्टेशन गु.र.नं. ४०८/२०२५ अन्वये भारतीय हत्यार कायदा कलम ३ (२५) व महाराष्ट्र पोलीस अॅक्ट कलम ३७ (१) सह १३५ अंतर्गत गुन्हा दाखल करण्यात आला आहे.
तपास व सखोल चौकशी :
सदर गुन्ह्याचा पुढील तपास पोलीस उप निरीक्षक हसन मुलाणी हे करत असून, आरोपीचा मागील गुन्हेगारी इतिहास, कनेक्शन, आणि तो शस्त्र घेऊन काय कारवाई करणार होता याचा तपास करण्यात येत आहे. शस्त्र कुठून मिळाले, कोणाच्या सांगण्यावरून त्याने ते जवळ ठेवले, या दृष्टीने सखोल चौकशी सुरू आहे.
वरिष्ठ अधिकाऱ्यांचे मार्गदर्शन :
ही कारवाई मा. अपर पोलीस आयुक्त (पुर्व), श्री. मनोज पाटील, मा. पोलीस उप-आयुक्त, परिमंडळ ५, डॉ. राजकुमार शिंदे, मा. सहाय्यक पोलीस आयुक्त, श्रीमती अनुराधा उदमले, तसेच वरिष्ठ पोलीस निरीक्षक श्री. संजय मोगले आणि पोनि (गुन्हे) निलेश जगदाळे यांच्या सूचनांवर आधारित होती.
कारवाईत सहभागी पोलिसांचे विशेष योगदान :
या कामगिरीमध्ये पोलीस उप-निरीक्षक हसन मुलाणी, सत्यवान गेंड, अविनाश गोसावी, दीपक कांबळे, अमित साखरे, निलेश किरवे, बापु दणके, अजित मदने, अभिजीत राऊत, तुकाराम झुंजार, महेश चव्हाण, कुंडलिक रेजितवाड, महावीर लोंढे यांच्यासह लोणकर, अमोल केसकर, चंद्रकांत यांचे मोलाचे योगदान राहिले.
नागरिकांचे संरक्षण हेच ध्येय :
पोलिसांनी वेळेवर कार्यवाही करत गंभीर गुन्ह्याचा संभाव्य धोका टाळला. हडपसर पोलिसांची ही तत्परता आणि दक्षता गुन्हेगारी प्रवृत्तीच्या विरोधात प्रभावी पाऊल ठरली आहे. पुणे शहरात कायदा व सुव्यवस्थेचा बळकटीसाठी ही कारवाई आदर्श ठरणारी आहे.
