कल्याण-डोंबिवली परिसरात सुरू असलेल्या मुसळधार पावसाने जनजीवन अक्षरशः विस्कळीत केले आहे. मंगळवारपासून सुरू झालेल्या संततधार पावसाने बुधवारी पुन्हा जोर धरत शहरातील अनेक भाग जलमय झाले. शिळफाटा परिसरात रस्त्यांवर मोठ्या प्रमाणात पाणी साचल्याने वाहतूक पूर्णपणे विस्कळीत झाली असून अनेक चारचाकी वाहने पाण्याखाली गेल्याचे भीषण चित्र समोर आले आहे. तर मुंबई-नाशिक महामार्गावरही प्रचंड वाहतूक कोंडी झाल्याने वाहनचालकांना तासन्तास अडकून पडावे लागत आहे.
मंगळवारी दिवसभर रिमझिम आणि अधूनमधून मुसळधार पाऊस सुरू होता. रात्री उशिरापासून पावसाचा जोर आणखी वाढला आणि संपूर्ण रात्र मुसळधार पाऊस कोसळत राहिला. बुधवारी सकाळी सुमारे नऊ वाजण्याच्या सुमारास पावसाने काही काळ विश्रांती घेतल्याने नागरिकांना दिलासा मिळाल्याचे वाटत होते. मात्र काही मिनिटांतच आकाश काळ्या ढगांनी व्यापले आणि पुन्हा एकदा मुसळधार पावसाला सुरुवात झाली. त्यानंतर पावसाचा जोर सतत कायम राहिल्याने शहरातील अनेक भागांमध्ये पाणी साचले.
शिळफाटा परिसरात जलसंकट, वाहने पाण्याखाली
शिळफाटा परिसरात परिस्थिती सर्वाधिक गंभीर झाली आहे. रस्त्यांवर गुडघाभर ते कंबरभर पाणी साचल्याने वाहतूक ठप्प झाली आहे. रस्त्यालगत उभी असलेली अनेक चारचाकी वाहने अर्धी ते पूर्णपणे पाण्याखाली गेल्याचे दृश्य पाहायला मिळाले. काही वाहनचालकांनी आपली वाहने सुरक्षित ठिकाणी हलवण्याचा प्रयत्न केला, तर अनेक वाहने पाण्यात अडकून पडली.
प्रशासन आणि स्थानिक यंत्रणांकडून पाण्यात अडकलेली वाहने बाहेर काढण्याचे काम सुरू करण्यात आले असून नागरिकांना अनावश्यक प्रवास टाळण्याचे आवाहन करण्यात येत आहे.
कल्याण-शीळ मार्गावर वाहतुकीचा खोळंबा
सततच्या पावसामुळे कल्याण-शीळ रोडवर मोठ्या प्रमाणात वाहतूक कोंडी निर्माण झाली आहे. कार्यालयीन वेळेत हजारो वाहनचालकांना तासन्तास वाहतूक कोंडीत अडकून पडावे लागले. बस, रिक्षा, खासगी वाहने आणि मालवाहू ट्रक यांची लांबच लांब रांग लागल्याने प्रवाशांचे मोठे हाल झाले.
राजू पाटील यांची प्रशासनावर टीका
मनसेचे माजी आमदार राजू पाटील यांनी या परिस्थितीवर तीव्र नाराजी व्यक्त केली आहे. त्यांनी सोशल मीडियावर व्हिडिओ शेअर करत एमएमआरडीए, एमएसआरडीसी आणि संबंधित स्थानिक प्रशासनावर टीका केली. नालेसफाई वेळेत न करणे, नैसर्गिक नाल्यांवरील अतिक्रमण हटवण्यात झालेला विलंब आणि नियोजनाचा अभाव यामुळेच शिळफाटा परिसर पाण्याखाली गेल्याचा आरोप त्यांनी केला.
त्यांनी म्हटले की, “राजाने मारले आणि पावसाने झोडले” अशी परिस्थिती नागरिकांवर ओढवली असून संपूर्ण मुंबई महानगर प्रदेशात कमी-अधिक प्रमाणात हीच अवस्था आहे.
सखल भागांतील घरांमध्ये पाणी
मुसळधार पावसाचा फटका कल्याण पूर्वेतील सखल भागांनाही बसला आहे. आडीवली, ढोकळी आणि इतर काही परिसरातील घरांमध्ये पावसाचे पाणी शिरल्याची माहिती समोर आली आहे. नागरिकांना घरातील साहित्य सुरक्षित ठिकाणी हलवण्यासाठी मोठी धावपळ करावी लागली. अनेक ठिकाणी पाणी उपसण्यासाठी प्रशासनाच्या पथकांना पाचारण करण्यात आले आहे.
मुंबई-नाशिक महामार्गावर वाहतुकीची कोंडी
कल्याण-डोंबिवलीपुरतेच नव्हे तर अंबरनाथ, बदलापूर, टिटवाळा आणि भिवंडी परिसरातही मुसळधार पावसाचा जोर कायम आहे. त्यामुळे भिवंडी बायपासपासून मुंबईच्या दिशेने जाणाऱ्या मुंबई-नाशिक महामार्गावर प्रचंड वाहतूक कोंडी झाली आहे. अनेक किलोमीटरपर्यंत वाहनांच्या रांगा लागल्या असून हजारो वाहनचालक आणि प्रवासी महामार्गावर अडकून पडले आहेत.
जड वाहतूक, रस्त्यावर साचलेले पाणी आणि कमी झालेली वाहनांची गती यामुळे महामार्गावरील परिस्थिती अधिकच गंभीर झाली आहे. आपत्कालीन सेवांच्या वाहनांनाही मार्ग काढताना अडचणींचा सामना करावा लागत असल्याचे चित्र आहे.
प्रशासन सतर्क, नागरिकांना सावध राहण्याचे आवाहन
हवामान विभागाने पुढील काही तासांतही मुसळधार पावसाचा अंदाज व्यक्त केल्याने प्रशासन सतर्क झाले आहे. आपत्ती व्यवस्थापन पथके, अग्निशमन दल आणि महापालिका कर्मचारी विविध भागांमध्ये तैनात करण्यात आले आहेत. सखल भागातील नागरिकांनी आवश्यक ती खबरदारी घ्यावी, पाण्याने भरलेल्या रस्त्यांवरून प्रवास टाळावा आणि प्रशासनाच्या सूचनांचे पालन करावे, असे आवाहन करण्यात आले आहे.
सततच्या पावसामुळे नागरिकांचे दैनंदिन जीवन विस्कळीत झाले असून शाळा, कार्यालये आणि व्यावसायिक व्यवहारांवरही त्याचा मोठा परिणाम झाला आहे. पावसाचा जोर कायम राहिल्यास परिस्थिती आणखी गंभीर होण्याची शक्यता व्यक्त केली जात आहे.
