देशभर गाजत असलेल्या NEET पेपरफुटी प्रकरणात आता लातूर शहरातील तपास अधिक तीव्र झाला असून केंद्रीय अन्वेषण विभागाने (CBI) मोठी कारवाई करत एका बालरोगतज्ज्ञ डॉक्टरच्या घरी धाड टाकली आहे. औसा रोड परिसरातील या डॉक्टरच्या निवासस्थानी CBIचे पथक तब्बल तीन तासांहून अधिक काळ चौकशी करत असल्याने लातूर शहरात मोठी खळबळ उडाली आहे. या प्रकरणामुळे राज्यातील शैक्षणिक क्षेत्र, पालक आणि विद्यार्थ्यांमध्ये चिंतेचे वातावरण निर्माण झाले आहे. वैद्यकीय प्रवेशासाठी अत्यंत महत्त्वाची मानली जाणारी NEET परीक्षा पारदर्शकतेवर प्रश्नचिन्ह निर्माण झाल्याने देशभरातून संताप व्यक्त केला जात आहे.
मिळालेल्या माहितीनुसार, संबंधित बालरोगतज्ज्ञ डॉक्टरांची मुलगी यावर्षी NEET परीक्षा देणार होती. परीक्षेपूर्वीच पेपर मिळाल्याच्या संशयावरून CBIने चौकशी सुरू केली आहे. याआधीही लातूरमधील काही डॉक्टरांनी आपल्या मुलांसाठी कथितरित्या पेपर विकत घेतल्याच्या चर्चा सुरू होत्या. त्याच पार्श्वभूमीवर CBIने तपासाची व्याप्ती वाढवत आता डॉक्टरांपर्यंत धागेदोरे पोहोचवले आहेत.
यापूर्वी CBIने लातूरमधील निवृत्त रसायनशास्त्र प्राध्यापक पी. व्ही. कुलकर्णी आणि RCC या खासगी क्लासेसचे संचालक शिवराज मोटेगावकर यांच्याविरोधात कारवाई केली होती. शिवराज मोटेगावकर यांच्या खाजगी शिकवणी संस्थेवर दिवसभर कागदपत्रांची तपासणी करण्यात आली. तसेच त्यांच्या इलेक्ट्रॉनिक उपकरणांमधील डेटा तपासण्यात येत असल्याची माहिती समोर आली आहे.
दरम्यान, शिवराज मोटेगावकर यांना दिल्लीतील विशेष न्यायालयात हजर करण्यात आले होते. न्यायालयाने त्यांना 9 दिवसांची CBI कोठडी सुनावली आहे. CBIने न्यायालयात दावा केला की, मोटेगावकर यांनी मोबाईल आणि लॅपटॉपमधील महत्त्वाचे पुरावे डिलीट करण्याचा प्रयत्न केला होता. मात्र तांत्रिक तपासाद्वारे डिलीट झालेला डेटा रिकव्हर करण्यात यश आल्याचे CBIने सांगितले.
तपास यंत्रणांच्या मते, या प्रकरणात मोठे रॅकेट कार्यरत असण्याची शक्यता नाकारता येत नाही. विद्यार्थ्यांना परीक्षा सुरू होण्यापूर्वी प्रश्नपत्रिका उपलब्ध करून देण्यासाठी मोठ्या प्रमाणावर पैशांची देवाणघेवाण झाल्याचा संशय व्यक्त केला जात आहे. लातूरसारख्या शिक्षणनगरीत अशा प्रकारचा प्रकार उघडकीस आल्याने संपूर्ण राज्यात चर्चा रंगली आहे.
CBIचे पथक मागील सहा दिवसांपासून लातूरमध्ये तळ ठोकून असून अनेक ठिकाणी तपास सुरू आहे. काही खासगी क्लासेस, शिक्षक, मध्यस्थ आणि पालक यांच्यातील आर्थिक व्यवहारांचाही तपास केला जात असल्याची माहिती मिळत आहे. त्यामुळे आगामी काळात आणखी काही मोठी नावे समोर येण्याची शक्यता वर्तवली जात आहे. या प्रकरणामुळे मेहनतीने अभ्यास करणाऱ्या विद्यार्थ्यांमध्ये संतापाची भावना निर्माण झाली आहे. “जर पेपर आधीच विकले जात असतील तर प्रामाणिक विद्यार्थ्यांचे भविष्य धोक्यात येईल,” अशी प्रतिक्रिया अनेक विद्यार्थ्यांनी व्यक्त केली आहे. पालकांनीही या प्रकरणाचा सखोल तपास करून दोषींवर कठोर कारवाई करण्याची मागणी केली आहे.
शैक्षणिक क्षेत्रातील तज्ज्ञांनी NEETसारख्या राष्ट्रीय स्तरावरील परीक्षांची सुरक्षा व्यवस्था अधिक मजबूत करण्याची गरज व्यक्त केली आहे. ऑनलाईन आणि ऑफलाईन पातळीवर प्रश्नपत्रिका सुरक्षित ठेवण्यासाठी केंद्र सरकारने कठोर यंत्रणा उभी करावी, अशी मागणीही जोर धरू लागली आहे. आता पुढील काही दिवसांत CBIच्या तपासातून आणखी कोणती नावे समोर येतात आणि या संपूर्ण पेपरफुटी प्रकरणामागील खरे सूत्रधार कोण आहेत, याकडे संपूर्ण राज्याचे लक्ष लागले आहे.
