पिंपरी, दि. ३ जुलै २०२६ : आषाढी एकादशीच्या पवित्र पर्वानिमित्त संतश्रेष्ठ श्री संत ज्ञानेश्वर महाराज आणि जगद्गुरू श्री संत तुकाराम महाराज यांच्या पालखी सोहळ्यासाठी लाखो वारकरी पंढरीच्या दिशेने मार्गस्थ होत आहेत. या पार्श्वभूमीवर पिंपरी-चिंचवड शहरातून जाणाऱ्या पालखी मार्गावरील सर्व नागरी सुविधा अधिक सक्षम करण्यासाठी महापालिका प्रशासनाने युद्धपातळीवर तयारी सुरू केली आहे. वारकरी बांधवांना कोणत्याही प्रकारची गैरसोय होऊ नये, यासाठी महापौर रवि लांडगे यांनी पालखी मार्गाची प्रत्यक्ष पाहणी करून विविध विभागांच्या कामांचा सविस्तर आढावा घेतला.
महापौरांनी स्पष्ट शब्दांत सांगितले की, पालखी सोहळा हा महाराष्ट्राच्या संतपरंपरेचा, अध्यात्माचा आणि सामाजिक ऐक्याचा अमूल्य वारसा आहे. या सोहळ्यात सहभागी होणाऱ्या प्रत्येक वारकऱ्याला सुरक्षित, स्वच्छ आणि सुसज्ज वातावरण मिळणे ही महापालिकेची जबाबदारी आहे. त्यामुळे सर्व विभागांनी परस्पर समन्वयाने काम करून प्रत्येक सुविधा वेळेत उपलब्ध करून द्यावी, असे निर्देश त्यांनी दिले.
मॅगझीन चौक ते भक्ती-शक्ती चौकाची पाहणी
सकाळी ८ वाजता मॅगझीन चौकातून पाहणी दौऱ्याची सुरुवात करण्यात आली. त्यानंतर भक्ती-शक्ती चौक, निगडी येथे विविध विभागांनी केलेल्या कामांची पाहणी करण्यात आली. पालखी मार्गावरील रस्त्यांची स्थिती, स्वच्छता, पिण्याच्या पाण्याची व्यवस्था, चलत शौचालये, आरोग्य सुविधा, रुग्णवाहिका, अग्निशमन यंत्रणा, प्रकाश व्यवस्था, दिशादर्शक फलक, वाहतूक नियोजन तसेच वारकऱ्यांसाठी उभारण्यात आलेल्या विविध सुविधा यांची महापौरांनी सखोल माहिती घेतली.
यावेळी अतिरिक्त आयुक्त कुलदीप जंगम, सह शहर अभियंता बापू गायकवाड, उपआयुक्त अण्णा बोदडे, क्षेत्रीय अधिकारी अतुल पाटील, मुख्य सुरक्षा अधिकारी उदय जरांडे, निवेदिता घार्गे, कार्यकारी अभियंता शिवाजी चौरे, दमयंती पवार, चंद्रकांत मुथाळ, जनता संपर्क अधिकारी प्रफुल्ल पुराणिक तसेच आरोग्य, स्वच्छता, पाणीपुरवठा, विद्युत, वाहतूक, आपत्ती व्यवस्थापन आणि इतर संबंधित विभागांचे अधिकारी उपस्थित होते.
वारकऱ्यांसाठी विशेष सुविधा
महापालिकेकडून यंदाच्या पालखी सोहळ्यासाठी अनेक विशेष सुविधा उपलब्ध करून देण्यात येत आहेत. वारकऱ्यांना स्वच्छ पिण्याचे पाणी, तात्पुरती विश्रांती केंद्रे, चलत स्वच्छतागृहे, वैद्यकीय पथके, रुग्णवाहिका, आपत्कालीन आरोग्य सेवा, अग्निशमन पथके, सीसीटीव्ही देखरेख, वाहतूक नियंत्रण आणि सुरक्षा व्यवस्था अधिक बळकट करण्यात आली आहे.
याशिवाय पालखी मार्गावर स्वच्छतेसाठी विशेष कर्मचारी तैनात करण्यात आले असून कचरा व्यवस्थापन, निर्जंतुकीकरण आणि सार्वजनिक आरोग्याच्या दृष्टीने आवश्यक उपाययोजना करण्यात येत आहेत. पावसाळ्याचा काळ लक्षात घेऊन जलनिस्सारण व्यवस्था, सखल भागांची पाहणी आणि आपत्कालीन प्रतिसाद यंत्रणाही सज्ज ठेवण्यात आली आहे.
समन्वयावर भर
महापौर रवि लांडगे यांनी सर्व विभागांना कोणतीही त्रुटी राहू नये, यासाठी सातत्याने समन्वय ठेवण्याच्या सूचना दिल्या. पालखी मार्गावर २४ तास नियंत्रण कक्ष कार्यरत ठेवणे, वारकऱ्यांच्या तक्रारींवर त्वरित कार्यवाही करणे आणि प्रत्येक विभागाने सतर्क राहणे आवश्यक असल्याचे त्यांनी सांगितले.
ते पुढे म्हणाले की, वारकरी हा महाराष्ट्राच्या संस्कृतीचा आत्मा आहे. लाखो भाविकांच्या श्रद्धेचा हा उत्सव कोणत्याही अडचणीशिवाय पार पडावा, यासाठी महापालिका प्रशासन पूर्ण क्षमतेने कार्यरत आहे.
आध्यात्मिक परंपरेला आधुनिक व्यवस्थेची जोड
पिंपरी-चिंचवड महापालिका दरवर्षी पालखी सोहळ्यासाठी विशेष नियोजन करत असते. यंदाही आधुनिक तंत्रज्ञान, सक्षम प्रशासन आणि प्रभावी आपत्ती व्यवस्थापनाच्या मदतीने वारकऱ्यांना अधिक सुरक्षित आणि सुखकर वारीचा अनुभव देण्याचा प्रयत्न करण्यात येत आहे. प्रशासनाने नागरिकांनाही वाहतूक नियमांचे पालन करून पालखी सोहळ्यास सहकार्य करण्याचे आवाहन केले आहे.
आषाढी वारी हा केवळ धार्मिक सोहळा नसून सामाजिक ऐक्य, समता आणि भक्तीचा संदेश देणारा उत्सव आहे. त्यामुळे पिंपरी-चिंचवड शहरात वारकऱ्यांचे उत्साहाने स्वागत करण्यासाठी प्रशासनासह नागरिकही सज्ज झाले आहेत.
