घरकर्ज व वाहनकर्जाच्या EMI मध्ये मोठी कपात; RBI चा ऐतिहासिक निर्णय, लाखो कर्जदारांना दिलासा

नवी दिल्ली – भारतीय रिझर्व्ह बँकेने आज घेतलेल्या महत्त्वपूर्ण निर्णयामुळे गृहकर्ज आणि वाहनकर्ज घेतलेल्या नागरिकांना मोठा दिलासा मिळणार आहे. RBI चे गव्हर्नर संजय मल्होत्रा यांनी जाहीर केले की, अर्थव्यवस्थेतील स्थिरता, कमी होत असलेला महागाई दर आणि वेगाने सुधारणारा विकास दर यामुळे रेपो रेटमध्ये तब्बल 0.25 टक्क्यांची कपात करण्यात येत आहे.

या निर्णयानंतर रेपो रेट 5.25 टक्क्यांवर येऊन पोहोचला आहे. याचा थेट फायदा बँकांकडून घेण्यात येणाऱ्या गृहकर्ज, वाहनकर्ज आणि इतर कर्जांच्या व्याजदरांवर होणार आहे आणि त्यामुळे नागरिकांच्या EMI मध्ये लक्षणीय घट होण्याची शक्यता आहे.

कर्जदारांसाठी नेमका फायदा काय?

• EMI काहीशे ते काही हजार रुपयांपर्यंत कमी होण्याची अपेक्षा

• कर्जाचा एकूण भार कमी, हप्त्यांचे व्यवस्थापन अधिक सोपे

• नवीन गृहकर्ज/वाहनकर्ज घेणाऱ्यांसाठीही मोठे आकर्षण

• रिअल इस्टेट, ऑटोमोबाईल आणि बँकिंग सेक्टरमध्ये हालचाल वाढणार

आर्थिक तज्ज्ञांच्या मते, RBI चा हा निर्णय बाजारात लिक्विडिटी वाढवेल, नागरिकांची खरेदीक्षमता वाढवेल आणि अर्थव्यवस्थेला अधिक चालना मिळेल.

 यंदा आधीच 1% कपात – आता आणखी 0.25% कपात

रिझर्व्ह बँकेने यंदाच्या वर्षात:

• फेब्रुवारीत 0.25% कपात

• एप्रिलमध्ये 0.25% कपात

• जूनमध्ये 0.50% कपात

असे मिळून रेपो रेट एकूण 1% ने कमी केला होता. आता पुन्हा 0.25% कपात झाल्याने बँकांच्या कर्जधोरणात आणखी सुलभता येणार आहे.

 RBI चे वक्तव्य

RBI गव्हर्नर संजय मल्होत्रा यांनी सांगितले की,
“महागाई नियंत्रित आहे आणि देशाचा विकासदर मजबूत आहे. नागरिकांना आर्थिक सुसह्यतेचा अनुभव देण्यासाठी व्याजदर कपात गरजेची होती.”

 गृहकर्ज आणि वाहनकर्ज क्षेत्रात नवी चैतन्य

रिअल इस्टेट क्षेत्राने या निर्णयाचे स्वागत केले असून नवीन घर खरेदी करणाऱ्यांची संख्या वाढण्याची शक्यता वर्तवली जात आहे. ऑटो उद्योगातही विक्री वाढेल असा अंदाज आहे, कारण EMI कमी झाल्याने कार, टू-व्हीलर खरेदी अधिक लोकांना परवडणारी होईल.