पिंपरी-चिंचवड शहरातील अत्यंत वर्दळीच्या बेंगळुरू–मुंबई महामार्गावरील वाकड पुलाचे रखडलेले काम आता नागरिकांच्या संतापाचा विषय बनले आहे. गेल्या अनेक दिवसांपासून पुलाचे काम संथ गतीने सुरू असल्यामुळे वाकड, ताथवडे, पुनावळे, हिंजवडी आणि आसपासच्या परिसरात मोठ्या प्रमाणावर वाहतूक कोंडी निर्माण होत आहे. या पार्श्वभूमीवर नगरसेविका तथा पिंपरी-चिंचवड महापालिकेच्या शिक्षण समिती सदस्य श्रुती राम वाकडकर यांनी महापालिका आयुक्तांकडे निवेदन देत पुलाचे काम तातडीने पूर्ण करण्याची मागणी केली आहे.
दररोज सकाळी आणि संध्याकाळच्या गर्दीच्या वेळेत या परिसरातील मुख्य रस्त्यांवर वाहनांच्या लांबच लांब रांगा लागलेल्या दिसत आहेत. आयटी कंपन्यांमध्ये काम करणारे कर्मचारी, विद्यार्थी, व्यापारी, रुग्णवाहिका तसेच सर्वसामान्य नागरिकांना वाहतूक कोंडीचा मोठा फटका बसत आहे. अनेकांना कार्यालय आणि शाळांमध्ये वेळेत पोहोचण्यासाठी मोठ्या अडचणींचा सामना करावा लागत आहे. विशेषतः हिंजवडी आयटी पार्ककडे जाणाऱ्या वाहनांची संख्या मोठी असल्यामुळे वाकड परिसरातील वाहतूक व्यवस्था पूर्णपणे विस्कळीत होत असल्याचे नागरिकांचे म्हणणे आहे. वाहतुकीचा ताण कमी करण्यासाठी आणि नागरिकांना दिलासा देण्यासाठी वाकड पुलाचे काम सुरू करण्यात आले होते. मात्र काम रखडल्याने परिस्थिती आणखी गंभीर बनली आहे.
नगरसेविका श्रुती वाकडकर यांनी निवेदनात म्हटले आहे की, “वाकड पुलाचे काम रखडल्यामुळे नागरिकांना दररोज प्रचंड मानसिक आणि शारीरिक त्रास सहन करावा लागत आहे. वाहतूक कोंडीमुळे इंधनाचा अपव्यय होत असून प्रदूषणातही वाढ होत आहे. प्रशासनाने याची गांभीर्याने दखल घेऊन हे काम युद्धपातळीवर पूर्ण करावे.”
निवेदनात पुलाचे काम पूर्ण होईपर्यंत तात्पुरत्या स्वरूपात वाहतूक व्यवस्थापनासाठी प्रभावी उपाययोजना करण्याची मागणीही करण्यात आली आहे. अतिरिक्त वाहतूक पोलीस नियुक्त करणे, पर्यायी मार्गांची व्यवस्था करणे, वाहतूक नियंत्रणासाठी सिग्नल प्रणाली सुधारणा करणे तसेच नागरिकांना वाहतुकीबाबत वेळोवेळी माहिती देणे आवश्यक असल्याचे नमूद करण्यात आले आहे.
स्थानिक नागरिकांनीही प्रशासनाविरोधात नाराजी व्यक्त केली आहे. “काम सुरू झाल्यानंतर सुरुवातीला गती होती, पण आता काम अत्यंत मंदावले आहे. रोजच्या वाहतूक कोंडीमुळे वेळ आणि पैशांचा मोठा अपव्यय होत आहे,” अशी प्रतिक्रिया काही वाहनचालकांनी दिली. व्यावसायिकांनाही या परिस्थितीचा फटका बसत आहे. वाहतूक कोंडीमुळे ग्राहक आणि पुरवठा व्यवस्थेवर परिणाम होत असल्याने स्थानिक व्यवसायांनाही आर्थिक नुकसान सहन करावे लागत असल्याचे व्यापाऱ्यांचे म्हणणे आहे. दरम्यान, महापालिका आयुक्तांनी या समस्येची तातडीने दखल घेत संबंधित विभागाला आवश्यक सूचना दिल्याची माहिती समोर आली आहे. पुलाचे काम वेगाने पूर्ण करण्यासाठी आणि वाहतूक कोंडी कमी करण्यासाठी लवकरच ठोस उपाययोजना करण्यात येणार असल्याचे प्रशासनाकडून सांगितले जात आहे.
वाकड पुलाचे काम पूर्ण झाल्यानंतर या परिसरातील वाहतूक व्यवस्थेला मोठा दिलासा मिळेल, अशी अपेक्षा नागरिकांकडून व्यक्त केली जात आहे. मात्र तोपर्यंत प्रशासनाने तातडीने प्रभावी पावले उचलावीत, अशी मागणी जोर धरत आहे
