पुणे | १८ जून २०२५ – मावळ तालुक्यातील कुंडमळा येथे इंद्रायणी नदीवरील पूल कोसळून झालेल्या भीषण दुर्घटनेनंतर जिल्हाधिकारी आणि जिल्हा आपत्ती व्यवस्थापन प्राधिकरणाचे अध्यक्ष जितेंद्र डुडी यांनी तातडीने बैठकीचे आयोजन करून जिल्ह्यातील सर्व पूल, रस्ते, वाडे, धोकादायक इमारती, रेल्वे पूल, फलक व इतर सार्वजनिक संरचना यांची structural audit करण्याचे आदेश दिले. या दुर्घटनेत किमान चार नागरिकांचा मृत्यू झाला असून ५१ जण जखमी झाले. त्यामुळे जिल्हा प्रशासनाने आपत्तीपूर्व तयारीचा कठोर आराखडा राबवण्यास सुरुवात केली आहे.
सात दिवसांत सखोल तपासणी व अहवाल सादर करण्याचे निर्देश
डुडी यांनी स्पष्ट आदेश दिले की, सर्व धोकादायक व जीर्ण झालेल्या रचनांची सात दिवसांत पाहणी करून अहवाल जिल्हा आपत्ती व्यवस्थापन कक्षात सादर करावा. कोणतीही रचना धोकादायक आढळल्यास त्वरित विनाअडथळा व सार्वजनिक गैरसोयीशिवाय तोडण्याची कार्यवाही करावी. या बैठकीला जिल्हा परिषद मुख्य कार्यकारी अधिकारी गजानन पाटील, ग्रामीण पोलीस अधीक्षक संदीप गीले, आपत्ती व्यवस्थापन अधिकारी विठ्ठल बानोटे व इतर अधिकारी उपस्थित होते.
पावसाळी आपत्तींना सामोरे जाण्यासाठी समन्वयित उपाययोजना
डुडी यांनी सांगितले की, पावसाळ्यात पाणी साचणारे रस्ते, घसरणीच्या धोक्याची ठिकाणे, वीजेच्या पोल व ट्रान्सफॉर्मर, झाडे व फलक यांची विशेष काळजी घेतली जावी.
“प्रत्येक तालुक्यातील नियंत्रण कक्ष २४ तास कार्यरत ठेवावा. गरजेनुसार अतिरिक्त कर्मचारी नियुक्त करावेत. धोकादायक ठिकाणी mock drill आयोजित कराव्यात,” असेही त्यांनी सुचवले. पर्यटकांचे जीव धोक्यात येऊ नयेत यासाठी धोकादायक स्थळांवर प्रवेशबंदी, योग्य फलक व मार्गदर्शक सूचना लावण्याचे आदेशही त्यांनी दिले.
आरोग्य, वीज व पोलिस यंत्रणांचीही सज्जता आवश्यक
जिल्हाधिकाऱ्यांनी आरोग्य विभागाला सर्व रुग्णालयांची तयारी तपासण्याचे निर्देश दिले. यामध्ये पलंग, औषधे, कर्मचारी, अँब्युलन्स, रक्तपेढ्या यांची उपलब्धता सुनिश्चित करण्याचा आदेश दिला. महावितरणला वीज पोल, वायरिंग व ट्रान्सफॉर्मर यांची तपासणी करून सुरक्षिततेची हमी देण्यास सांगितले. पोलीस विभागाने लाइफगार्ड तैनात करणे व गरज असल्यास आपत्कालीन प्रतिबंधात्मक उपाय राबवणे आवश्यक असल्याचे त्यांनी सांगितले.
भूस्खलनग्रस्त गावांतील जनजागृती व पालखी मार्गावरील सुरक्षा
जिल्ह्यातील भूस्खलनप्रवण गावांमध्ये लोकांना वेळेवर सूचना मिळाव्यात यासाठी जनजागृती करावी, असे निर्देश देण्यात आले. येत्या संत तुकाराम व संत ज्ञानेश्वर महाराज यांच्या पालखी सोहळ्याच्या पार्श्वभूमीवर, पालखी मार्गावरील अनधिकृत फलक व धोकादायक झाडे तातडीने हटवण्याचे आदेशही त्यांनी दिले.
‘आपदा मित्र’ स्वयंसेवकांसाठी कार्यशाळा व प्रोत्साहन
डुडी यांनी सांगितले की, ‘आपदा मित्र’ किंवा आपत्ती व्यवस्थापन स्वयंसेवकांना आवश्यक सुविधा दिल्या जातील आणि त्यांना प्रशिक्षण देण्यासाठी कार्यशाळा घेण्यात येतील. चांगले काम करणाऱ्या स्वयंसेवकांचा गौरव केला जाईल, असेही ते म्हणाले.
नागरीकांशी थेट संवाद आणि पूर्व अनुभवाचा वापर
“आपत्ती व्यवस्थापन योजना जिल्हा ते गाव पातळीपर्यंत तयार करून, नागरिकांना साध्या भाषेत माहिती देण्यात यावी. मागील घटनांमधून शिकलेले धडे या नवीन योजनांमध्ये समाविष्ट करावेत,” असे निर्देशही जिल्हाधिकाऱ्यांनी यावेळी दिले.
हा निर्णय फक्त कुंडमळा दुर्घटनेचा प्रतिसाद नाही, तर भविष्यात अशा दुर्घटना टाळण्यासाठी एक सजग आणि ठोस पाऊल आहे.
