बेंगळुरू | प्रतिनिधी :- 18 वर्षांच्या प्रदीर्घ वाटचालीनंतर रॉयल चॅलेंजर्स बंगळुरू (RCB) संघाने अखेर आयपीएलचं विजेतेपद मिळवलं आणि या ऐतिहासिक क्षणाचा साक्षीदार होण्यासाठी हजारो चाहत्यांनी बेंगळुरूमधील एम. चिन्नास्वामी स्टेडियमबाहेर एकत्र गर्दी केली. मात्र, अनियंत्रित जमावामुळे झालेल्या चेंगराचेंगरीत 11 निष्पाप चाहत्यांचा मृत्यू झाला, तर अनेकजण जखमी झाले आहेत. विजयाच्या उत्साहात झालेल्या या हृदयद्रावक घटनेने संपूर्ण कर्नाटकासह देशभरात हळहळ व्यक्त केली जात आहे.
आरसीबीच्या विजयाचा जल्लोष अनुभवण्यासाठी स्टेडियम परिसरात चाहत्यांनी पहाटेपासूनच रांग लावली होती. संघाच्या आगमनाच्या वेळी झालेल्या अफवांमुळे आणि सुरक्षा व्यवस्थेतील त्रुटींमुळे एकाच वेळी हजारो लोकांनी आत घुसण्याचा प्रयत्न केला. त्याच वेळी गोंधळ, धावपळ, आणि अखेर चेंगराचेंगरी झाली. यात अनेक लोक खाली पडले, त्यांच्या अंगावर इतरजण चढले, आणि काहींचा श्वास गुदमरल्याने मृत्यू झाला.
आरसीबी संघाने अधिकृत निवेदनात व्यक्त केली शोकभावना घटनेनंतर रॉयल चॅलेंजर्स बंगळुरू संघाकडून एक अधिकृत निवेदन जारी करण्यात आलं. त्यात म्हटले आहे,
“आज दुपारी संघाच्या आगमनाच्या वेळी बेंगळुरूमध्ये लोकांच्या गर्दीमुळे घडलेल्या दुर्दैवी घटनांमुळे आम्हाला खूप दुःख झाले आहे. प्रत्येकाची सुरक्षितता आणि सर्वजण बरे असणं आमच्यासाठी अत्यंत महत्त्वाचे आहे. आरसीबी या दुःखद मृत्यूबद्दल शोक व्यक्त करते आणि पीडित कुटुंबांना मनापासून संवेदना व्यक्त करते.”
विजय मिरवणुकीचे आयोजन आणि अचानक उद्भवलेला गोंधळ कर्नाटक सरकारच्या सहकार्याने विजयी मिरवणुकीचे आयोजन करण्यात आले होते. चिन्नास्वामी स्टेडियमच्या बाहेर आणि मुख्य रस्त्यांवर मोठ्या प्रमाणावर लोक जमा झाले होते. अचानक अफवा पसरली की ‘RCB चे खेळाडू बाहेर येणार आहेत,’ आणि त्याच क्षणी लोकांनी प्रवेशद्वारांकडे धाव घेतली. यामुळे आरडाओरडा, घाबरगुंडी आणि गोंधळ उडाला.
राजकीय आणि सामाजिक क्षेत्रातून तीव्र प्रतिक्रिया या घटनेनंतर अनेक नेत्यांनी आणि सामाजिक कार्यकर्त्यांनी प्रशासनाच्या नियोजनशून्यतेवर प्रश्नचिन्ह उपस्थित केले आहे. अशा प्रकारच्या कार्यक्रमांसाठी योग्य सुरक्षा नियोजन आणि आकस्मिक परिस्थितींची तयारी असावी, अशी मागणी केली जात आहे.
जखमींवर तातडीने उपचार सुरू घटनेत जखमी झालेल्यांना तातडीने नजीकच्या रुग्णालयात दाखल करण्यात आलं असून काहींची प्रकृती गंभीर आहे. स्थानिक प्रशासनाने मृतांच्या कुटुंबीयांना आर्थिक मदतीची घोषणा केली आहे.
हा विजय का झाला काळा दिवस? आरसीबीच्या चाहत्यांसाठी हा विजय ऐतिहासिक होता. 18 वर्षांच्या वाटचालीनंतर मिळालेलं विजेतेपद साजरं करताना प्रचंड उत्साह आणि आनंदाचं वातावरण होतं. पण याच आनंदाने काहींच्या घरात काळोख केला. ही घटना प्रत्येक क्रिकेटप्रेमीच्या मनाला हादरवून टाकणारी आहे.
