पिंपरी : राज्यातील वाढत्या बेरोजगारी, रखडलेल्या नोकरभरती प्रक्रिया आणि वारंवार होणाऱ्या पेपरफुटीच्या घटनांविरोधात झुरळं जनता पार्टीच्या वतीने पिंपरी येथील डॉ. बाबासाहेब आंबेडकर चौकात ‘बेरोजगार एल्गार’ धरणे आंदोलन आयोजित करण्यात आले. शनिवारी सकाळी १० ते सायंकाळी ५ वाजेपर्यंत चाललेल्या या आंदोलनात बेरोजगार युवक-युवतींनी मोठ्या संख्येने सहभाग घेत शासनाचे लक्ष वेधण्याचा प्रयत्न केला.
आंदोलनापूर्वी आयोजकांच्या वतीने हवेली तालुक्याच्या तहसीलदारांना निवेदन देण्यात आले. या निवेदनात बेरोजगार तरुणांच्या १० महत्त्वपूर्ण मागण्या मांडण्यात आल्या असून त्यावर तातडीने निर्णय घेण्याची मागणी करण्यात आली आहे. राज्यभरातील लाखो स्पर्धा परीक्षा देणाऱ्या विद्यार्थ्यांच्या भावना आणि प्रश्न या आंदोलनातून मांडण्यात आल्याचे आयोजकांनी सांगितले.
झुरळं जनता पार्टीचे संस्थापक अभिजीत दीपके यांनी यावेळी बोलताना सांगितले की, “गेल्या काही वर्षांत वारंवार झालेल्या पेपरफुटी प्रकरणांमुळे लाखो विद्यार्थ्यांचे भविष्य धोक्यात आले आहे. अनेक भरती प्रक्रिया वर्षानुवर्षे रखडल्या आहेत. हजारो उमेदवार वयोमर्यादा ओलांडत असून त्यांचे करिअर अंधारात जात आहे. शासनाने केवळ आश्वासने न देता ठोस निर्णय घेणे आवश्यक आहे.”
आंदोलनादरम्यान तरुणांनी हातात फलक, बॅनर आणि घोषणाबाजी करत आपल्या मागण्यांकडे शासनाचे लक्ष वेधले. “नोकरी नाही तर मतदान नाही”, “तरुणांना रोजगार द्या”, “पेपरफुटी थांबवा” अशा घोषणांनी परिसर दणाणून गेला. अनेक स्पर्धा परीक्षेच्या विद्यार्थ्यांनी आपल्या व्यथा मांडत शासनाकडून न्याय मिळण्याची अपेक्षा व्यक्त केली.
या आंदोलनातून मांडण्यात आलेल्या प्रमुख मागण्यांमध्ये पेपरफुटी प्रकरणातील दोषींवर कठोर कारवाई, शिक्षण मंत्र्यांचा राजीनामा, आरोपींवर MCOCA अंतर्गत गुन्हे दाखल करणे, केंद्र व राज्य शासनातील सर्व रिक्त पदे पुढील सहा महिन्यांत भरणे, १८ ते ३५ वयोगटातील बेरोजगार युवकांना दरमहा ५ हजार रुपयांचा भत्ता देणे, स्पर्धा परीक्षांची फी माफ करणे, कंत्राटी भरती बंद करून कायमस्वरूपी नोकरभरती करणे, भरती प्रक्रियेतील गैरव्यवहारांसाठी २४×७ हेल्पलाईन सुरू करणे, मोफत कौशल्य प्रशिक्षण व नोकरीची हमी देणे आणि आंदोलनकर्त्यांना संरक्षण देणे यांचा समावेश आहे.
आंदोलन शांततामय आणि संविधानिक मार्गाने पार पडल्याचे आयोजकांनी स्पष्ट केले. कोणताही अनुचित प्रकार घडू नये यासाठी पोलिस बंदोबस्तही तैनात करण्यात आला होता. दिवसभर विविध वक्त्यांनी बेरोजगारीच्या प्रश्नावर भाष्य करत शासनाला धोरणात्मक बदल करण्याचे आवाहन केले.
सध्या राज्यात बेरोजगारी हा गंभीर सामाजिक आणि आर्थिक प्रश्न बनला असून शिक्षित तरुणांमध्ये वाढती अस्वस्थता दिसून येत आहे. अनेक पदवीधर आणि स्पर्धा परीक्षा उमेदवार वर्षानुवर्षे नोकरीच्या प्रतीक्षेत आहेत. त्यामुळे रोजगारनिर्मिती, पारदर्शक भरती प्रक्रिया आणि कौशल्य विकास यांना प्राधान्य देण्याची मागणी जोर धरू लागली आहे.
या आंदोलनामुळे पिंपरी-चिंचवड परिसरात बेरोजगारीचा प्रश्न पुन्हा एकदा चर्चेचा विषय ठरला असून राज्य सरकार या मागण्यांवर काय भूमिका घेते याकडे बेरोजगार तरुणांचे लक्ष लागले आहे. आगामी काळातही या प्रश्नावर अधिक तीव्र आंदोलन छेडण्याचा इशाराही आयोजकांनी दिला आहे.
