क्वालिटी कौन्सिल ऑफ इंडियाच्या अधिकाऱ्यांचा पिंपरी-चिंचवड महापालिकेच्या उत्कृष्ट अंमलबजावणीचा गौरव; ‘मुख्यमंत्री १०० दिवस उपक्रम’ आदर्श ठरण्याच्या वाटेवर!

पिंपरी-चिंचवड महापालिकेने ‘मुख्यमंत्री १०० दिवस उपक्रम’ अंतर्गत नागरिकसेवा केंद्रित कामकाजाची प्रभावी अंमलबजावणी करून इतर महापालिकांसाठी एक आदर्श घालून दिला आहे. या अंमलबजावणीची प्रत्यक्ष पाहणी करण्यासाठी क्वालिटी कौन्सिल ऑफ इंडिया (QCI) चे अधिकारी सुब्रतो घोष, एच. बी. चावला आणि जयेश यादव यांनी गुरुवारी (२४ एप्रिल) पिंपरी-चिंचवड महापालिकेची भेट घेतली.

या पाहणी दौऱ्यात अतिरिक्त आयुक्त प्रदीप जांभळे पाटील, विजयकुमार खोराटे, तृप्ती सांडभोर आणि विविध विभागप्रमुख उपस्थित होते. महानगरपालिका आयुक्त शेखर सिंह यांनी QCI अधिकाऱ्यांसमोर पालिकेच्या विविध योजनांची संगणकीय सादरीकरणाद्वारे प्रभावी मांडणी केली.

महानगरपालिका नागरिकांसाठी जलद, पारदर्शक आणि दर्जेदार सेवा देण्यासाठी विविध डिजिटल आणि ऑफलाईन उपक्रम राबवत आहे. यामध्ये ई-गव्हर्नन्स, स्वच्छता मोहिमा, नागरी सुविधा केंद्रांची उभारणी, रस्ते व पाणी पुरवठा प्रकल्प, महिला व दिव्यांग हिताच्या योजना, यांचा समावेश आहे.

 प्रत्यक्ष स्थळ पाहणीची ठळक वैशिष्ट्ये :

QCI अधिकाऱ्यांनी महापालिकेच्या प्रशासकीय इमारतीच्या चारही मजल्यांवर फिरून विविध यंत्रणांचे मूल्यांकन केले. यामध्ये खालील बाबींचा समावेश होता :

• नागरिक भेट व्यवस्थापन प्रणाली

• स्वच्छता गृह आणि दिव्यांगांसाठी उपलब्ध सुविधा

• पिण्याच्या पाण्याची उत्तम व्यवस्था

• प्रत्येक विभागातील अभिलेख व्यवस्थापनाची काटेकोर मांडणी

• शालेय विद्यार्थ्यांनी सजवलेली जिन्यांची भित्तिचित्रे

• स्थापत्य विभागाने लावलेल्या झाडांच्या कुंड्यांची आकर्षक सजावट

या सर्व गोष्टींचा गौरव करत QCI अधिकाऱ्यांनी महापालिकेच्या कामकाजाबाबत समाधान व्यक्त केले. विशेषतः झाडांच्या कुंड्यांची नजाकत, नागरी सेवा केंद्रातील शिस्तबद्धता आणि दिव्यांग सुविधांची चोख व्यवस्था याचे विशेष कौतुक करण्यात आले.

 कार्यसंस्कृतीचे गौरवोद्गार :

QCI चे अधिकारी म्हणाले की, “पिंपरी-चिंचवड महापालिकेचा कार्यपद्धती आणि लोकाभिमुख उपक्रम ही देशभरात लागू करण्यासारखी यशस्वी मॉडेल ठरू शकतात.” त्याचप्रमाणे, प्रशासनाच्या दृष्टिकोनातील स्पष्टता, जबाबदारी आणि डिजिटल सुसज्जता यामुळे नागरिकांचा विश्वास अधिकाधिक वाढत आहे, असेही मत त्यांनी व्यक्त केले.

 भविष्याची दिशा :

महानगरपालिका आयुक्त शेखर सिंह यांनी सांगितले की, “पिंपरी-चिंचवडकर नागरिकांना उत्कृष्ट सेवा देणे हेच आमचे ध्येय असून, प्रत्येक उपक्रमात गुणवत्ता आणि पारदर्शकता जपली जाईल.”

हा दौरा म्हणजे महापालिकेच्या गुणवत्ता व्यवस्थापनाच्या दिशेने उचललेले महत्त्वाचे पाऊल आहे. भविष्यात QCI च्या अहवालानुसार आणखी सुधारणा करण्याची तयारी देखील पालिकेने दर्शवली आहे.

कार्यक्रमात उपस्थित मान्यवर :

डॉ. मिलिंद निकम, संग्राम जगताप, अमित बांदल, तानाजी मराठे, अशोक जाधव, नयना डोळस, दीपाली पाटील, युगंधर बढे, मीनल रणदिवे, सुमेध सोनवणे, राजेश बारवे, संजय मेहता, भूषण गायकवाड यांनी देखील या दौऱ्याच्या व्यवस्थापनासाठी मोलाचे योगदान दिले.