“केवळ मेकअप करून कार्यक्रमात सहभागी होतात…” रोहिणी खडसेंची रुपाली चाकणकर यांच्यावर टीका

पुणे: राज्यात महिलांवरील अत्याचाराच्या वाढत्या घटनांवरून राष्ट्रवादी काँग्रेस (शरद पवार गट) महिला प्रदेशाध्यक्षा रोहिणी खडसे यांनी राज्य महिला आयोगाच्या अध्यक्षा रुपाली चाकणकर यांच्यावर जोरदार निशाणा साधला आहे. महिलांच्या सुरक्षेबाबत निष्क्रिय असल्याचा आरोप करत खडसेंनी चाकणकर यांच्यावर टीका केली.

महिला सुरक्षेच्या मागणीसाठी पुण्यात आंदोलन

महिलांवरील अत्याचार रोखण्यासाठी सरकारने कठोर पावले उचलावीत, या मागणीसाठी रोहिणी खडसे यांच्या नेतृत्वाखाली पुणे जिल्हाधिकारी कार्यालयाबाहेर आंदोलन करण्यात आले. यावेळी खडसे यांनी राज्य सरकार आणि महिला आयोगाच्या भूमिकेवर संताप व्यक्त केला.

“पुणे तिथे गुन्हेच गुन्हे…” खडसेंचा घणाघात

खडसे म्हणाल्या, “काही वर्षांपूर्वी ‘पुणे तिथे काय उणे’ ही म्हण प्रसिद्ध होती, मात्र आता ‘पुणे तिथे गुन्हेच गुन्हे’ अशी स्थिती झाली आहे. त्यामुळे आता पुणे शहराचे नाव ‘गुन्हे’ ठेवायला हरकत नाही.”

त्यांनी राज्यातील महिलांवरील वाढत्या अत्याचारांच्या घटनांचा उल्लेख करत सध्याच्या सरकारवर टीका केली. “महाविकास आघाडी सरकारच्या काळात शक्ती कायदा अंमलात आणण्याचे प्रयत्न झाले होते. मात्र, सध्याच्या सरकारकडून या कायद्याची अंमलबजावणी होत नाही. महिलांच्या सुरक्षेबाबत सरकारकडे कोणतेही गांभीर्य नाही, केवळ निवडणुका आल्या की ‘लाडकी बहिण’ योजना आठवते, पण त्याच ‘लाडक्या बहिणींच्या’ सुरक्षेचे काय?” असा सवाल त्यांनी उपस्थित केला.

“फक्त मेकअप करून कार्यक्रमांमध्ये सहभागी होतात…”

महिला आयोगाच्या अध्यक्षा रुपाली चाकणकर यांच्यावर थेट टीका करताना खडसे म्हणाल्या, “त्या फक्त चांगला मेकअप करून पक्षाच्या कार्यक्रमांमध्ये सहभागी होतात, पण महिलांच्या प्रश्नांवर काहीच करत नाहीत.”

खडसे यांनी हेही सांगितले की, “महिला आयोगाच्या अध्यक्षा म्हणून चाकणकर यांनी राज्यभरात घडणाऱ्या घटनांवर ठोस भूमिका घ्यायला हवी होती. मात्र, त्यांनी कधीच आवाज उठवला नाही. मंत्री गुलाबराव पाटील यांच्या वादग्रस्त विधानावरही त्यांनी कोणतीच प्रतिक्रिया दिली नाही.”

“सत्ताधारी पक्षाच्या आमदारांवरही गुन्हे, तरीही चुप्पी”

खडसे पुढे म्हणाल्या की, “सत्ताधारी पक्षातील अनेक आमदारांवर महिलांविरोधात गुन्हे दाखल आहेत, तरीही चाकणकर यांनी कधीही त्यांच्यावर टीका केली नाही किंवा राजीनाम्याची मागणी केली नाही.”

त्यांनी चाकणकर यांच्यावर आरोप करत सांगितले की, “त्या संपूर्ण महाराष्ट्राच्या महिला आयोगाच्या अध्यक्षा नसून केवळ सत्ताधारी पक्षाच्या आयोगाच्या अध्यक्षा आहेत.”

रुपाली चाकणकर यांचे प्रत्युत्तर काय?

खडसे यांच्या या घणाघाती टीकेला महिला आयोगाच्या अध्यक्षा रुपाली चाकणकर कशा प्रत्युत्तर देतात याकडे सर्वांचे लक्ष लागले आहे.