मोबाइल चोरी म्हणजे कायमचे हरवले अशी भावना आता चुकीची ठरली आहे. वाकड पोलिसांनी २० लाख रुपयांचे १२० मोबाईल शोधून त्यांचे मूळ मालकांना परत देऊन नागरिकांच्या चेहऱ्यावर आनंद फुलवला आहे.
वाकड पोलिसांची प्रामाणिक आणि तांत्रिक कामगिरी
पिंपरी-चिंचवड पोलिस आयुक्तालयाच्या हद्दीत मोबाईल चोरीचे प्रकार वाढत असल्यामुळे पोलिस आयुक्त विनयकुमार चौबे यांनी या समस्येवर तोडगा काढण्यासाठी विशेष मोहीम सुरू केली. या मोहिमेअंतर्गत, वाकड पोलीस ठाण्याच्या वरिष्ठ निरीक्षक निवृत्ती कोल्हटकर यांच्या नेतृत्वाखाली पोलीस पथकाने उत्कृष्ट कामगिरी बजावली.
परराज्यातून मोबाईल परत आणले
या मोहिमेचा महत्त्वाचा भाग म्हणजे गहाळ किंवा चोरीला गेलेले मोबाइल परराज्यांमध्ये ट्रेस करणे. बिहार, कर्नाटक, राजस्थान, गुजरात, आंध्रप्रदेश, तेलंगणा, आणि मध्यप्रदेश अशा विविध राज्यांत सापडलेल्या मोबाईलचा शोध घेऊन त्यांना परत आणण्यात आले. काही प्रकरणांमध्ये कायद्याचा धाक दाखवून मोबाइल हस्तगत करण्यात आले तर काही ठिकाणी पोलीस स्वतः जाऊन मोबाइल परत घेऊन आले.
तंत्रज्ञानाचा प्रभावी वापर
सेंट्रल इक्विपमेंट आयडेंटिटी रजिस्टर (CEIR) पोर्टलचा उपयोग करून मोबाईल ट्रेस करण्यात आला. या पोर्टलच्या मदतीने चोरीला गेलेले मोबाइल स्थानिक आणि परराज्यांमध्ये ओळखता आले, ज्यामुळे ही कामगिरी यशस्वी झाली.
नागरिकांचा प्रतिसाद
वाकड पोलीस ठाण्यात नागरिकांना त्यांच्या मोबाईल परत करण्यात आले. मोबाईल मिळाल्यावर नागरिकांच्या चेहऱ्यावर समाधान आणि आनंद दिसून आला. पोलिसांच्या या प्रयत्नांबद्दल नागरिकांनी कृतज्ञता व्यक्त केली आहे.
पुढील योजना
पोलीस उपायुक्त विशाल गायकवाड यांनी सांगितले की, अशा प्रकारची मोहीम यापुढेही सुरू राहील. नागरिकांचे हरवलेले मोबाइल परत मिळावेत यासाठी वाकड पोलीस ठाणे कटिबद्ध आहे.
