मोशीतील घनकचरा व्यवस्थापन प्रकल्पांचे निरीक्षण:
दिनांक २२ नोव्हेंबर २०२४ रोजी सकाळी ११ वाजता नवी मुंबई महानगरपालिकेचे मा. आयुक्त श्री. कैलास शिंदे व शहर अभियंता श्री. शिरीष आरदवाड यांनी पिंपरी-चिंचवड महानगरपालिकेच्या घनकचरा व्यवस्थापन प्रकल्पांना भेट देत त्यांचे बारकाईने निरीक्षण केले.
सदर भेटीदरम्यान वेस्ट टू एनर्जी प्रकल्प, हॉटेल वेस्ट टू बायोगॅस प्रकल्प तसेच राडारोडा व्यवस्थापन केंद्र या महत्त्वाच्या प्रकल्पांवरील तांत्रिक बाबींचा आढावा घेतला. प्रकल्प उभारणीदरम्यान आलेल्या आव्हानांवर मात करत या प्रकल्पांना यशस्वीरित्या कार्यान्वित केल्याबद्दल नवी मुंबई महापालिकेच्या आयुक्तांनी पिंपरी-चिंचवड महानगरपालिकेच्या कार्याचे कौतुक केले.
सादरीकरण व माहितीची देवाणघेवाण:
पिंपरी-चिंचवड शहरात दररोज निर्माण होणाऱ्या विविध प्रकारच्या घनकचऱ्याच्या व्यवस्थापनावर सविस्तर सादरीकरण श्री. संजय कुलकर्णी, मुख्य अभियंता, पिंपरी-चिंचवड महानगरपालिका यांनी केले.
सदर सादरीकरणामध्ये वेस्ट टू एनर्जी प्रकल्पांपासून बायोगॅस निर्मितीपर्यंतच्या प्रक्रियेची माहिती देण्यात आली. शिवाय, राडारोडा व्यवस्थापन केंद्राच्या कार्यपद्धती आणि त्याचा शहरातील बांधकाम व्यर्थ कचरा व्यवस्थापनावर होणारा सकारात्मक परिणाम यावरही भर देण्यात आला.
नवी मुंबई महापालिकेचे सकारात्मक प्रतिसाद:
मा. आयुक्त, नवी मुंबई महापालिका यांनी प्रकल्पांच्या उत्कृष्ट कार्यक्षमतेचे आणि पर्यावरणपूरक दृष्टिकोनाचे कौतुक केले.
ते म्हणाले की, “पिंपरी-चिंचवड महानगरपालिका स्टेट-ऑफ-द-आर्ट तंत्रज्ञानाचा वापर करून शाश्वत घनकचरा व्यवस्थापनाचे आदर्श उदाहरण सादर करत आहे.”
भेटीदरम्यान उपस्थित मान्यवर:
सदर पाहणीदरम्यान, नवी मुंबई महानगरपालिकेचे शहर अभियंता श्री. शिरीष आरदवाड, कार्यकारी अभियंता श्री. राजेश पवार, उप अभियंता श्री. जितेंद्र रावळ आणि पिंपरी-चिंचवड महानगरपालिकेचे उप अभियंता श्री. योगेश आल्हाट यांचीही उपस्थिती होती.
पिंपरी-चिंचवडच्या प्रकल्पांचे वैशिष्ट्ये:
- घनकचऱ्यावर शाश्वत व पर्यावरणपूरक प्रक्रिया.
- वेस्ट टू एनर्जी प्रकल्पामध्ये कचर्‍यापासून वीज निर्मिती.
- हॉटेल वेस्टचा बायोगॅस निर्मितीमध्ये उपयुक्त वापर.
- राडारोडा व्यवस्थापनाच्या अत्याधुनिक सुविधा.
या भेटीदरम्यान दिल्या गेलेल्या तांत्रिक मार्गदर्शनामुळे नवी मुंबई महापालिकेच्या भविष्यातील प्रकल्पांसाठीही प्रेरणा मिळणार आहे.
